Uwargidan Shugaban Ƙasa, Remi Tinubu, ta ce tattalin arziƙin Nijeriya na daidaita, yayin da hauhawar farashin kayayyaki ke raguwa, kuma ajiyar kuɗin ƙasar waje na ƙaruwa.
Ta bayyana hakan ne a wani taron wayar da kan mata da ƙarfafa musu gwiwa na jam’iyyar APC da aka gudanar a Abuja, gabanin zaɓen 2027.
Remi Tinubu ta ce sauye-sauyen da gwamnatin Tinubu ta aiwatar sun fara jawo masu zuba jari, taimaka wa manoma da kuma bai wa ɗalibai damar samun rance.
Ta ce Shugaba Bola Tinubu ya ɗauki matakai masu tsauri domin inganta tattalin arziƙin ƙasar, sannan ta yi kira ga ’yan Nijeriya da su ci gaba da mara wa gwamnatinsa baya.
Ta kuma roƙi matan Nijeriya da su haɗa kai tare wajen zaɓar APC a zaɓen shugaban ƙasa na 2027.
Matan ’yan majalisar wakilai su ma sun yi alƙawarin tattara ƙuri’un mata 20,000 daga kowace mazaɓar tarayya domin Tinubu a zaɓen 2027.
Sun kuma yi kira ga mata da su koma mazaɓunsu su fara kamfen gida-gida domin neman goyon bayan a zaɓi Shugaba Tinubu.
