Tattalin arzikin kasar Sin ya ci gaba da tafiya a turba mai kyau a watan Agusta, inda ci gabansa ya samu goyon bayan masana’antun manyan fasahohi, da bangaren ba da hidimomi da cinikayyar kasashen ketare, a cewar bayanan da hukumar kididdiga ta kasar (NBS) ta fitar a yau Talata.
Ayyukan sarrafa kaya na masana’antu ya karu a cikin watan, inda yawan kayan da masana’antu suka sarrafa ya karu da kashi 5.2% a mizanin shekara, wanda hakan ya nuna karuwar bangaren cikin hanzari da kashi 0.7% daga watan Yuli. Kazalika, ayyukan kere-keren kayan aiki sun karu da kashi 12.1%, yayin da masana’antun manyan fasahohi kuma suka samu karin ci gaba da kashi 16.7%.
Har ila yau, sabbin ginshikan samun bunkasa sun ci gaba da taka rawar gani ta daban, inda bangaren samar da batirin lithium ya karu da kashi 57.2% a mizanin shekara, yayin da kuma kere-keren mutum-mutumin inji na masana’antu da na’urorin dab’i na fasahar 3D suka karu da kashi 34.6% da kuma kashi 29.9% bi-da-bi.
Bangaren ba da hidimomi shi ma ya ci gaba da samun habaka ba tare da tangarda ba, inda ma’aunin sashen samar da ayyukan ba da hidimomi na kasa ya karu da kashi 4.1% a mizanin shekara a watan na Agusta.
Kazalika, bangaren cinikin kasar Sin a kasashen ketare shi ma tauraruwarsa ta haska, inda jimillar kudaden kayayyakin da aka shigo da su da wadanda aka fitar daga Sin ta kai yuan tiriliyan 4.65 (kimanin dala biliyan 647) a watan na Agusta, wanda ya karu da kashi 19.8% a mizanin shekara.
Bugu da kari, hada-hadar fitar da kayayyaki ta karu da kashi 18.6%, yayin da ta shigo da kayayyakin ta karu da kashi 21.7%. A cikin watanni takwas na farkon shekarar nan dai, jimillar cinikin kayayyaki ta karu da kashi 17.6%, inda fitar da kayayyakin injuna da na lantarki ta karu da kashi 21.9%. (Abdulrazaq Yahuza Jere)
