An rufe bikin baje kolin hada-hadar ba da hidima ta kasa da kasa CIFTIS na shekara ta 2026 a ranar 13 ga watan nan da muke ciki a nan Beijing. Wannan bikin ya jawo kamfanoni sama da 400 na manyan kamfanonin duniya 500 dake sahun gaba a duniya, da manyan kamfanonin masana’antu masu ba da jagoranci.
A bana, bikin ya fara kafa wani yanki na baje kolin “Hidimar Sin” , wanda kusan kashi hudu cikin goma daga cikinsu na mayar da hankali ne kan fasahar AI da manyan manhajojin AI da na’urori masu aiki da basira, da matakin dake bayyana karfin kirkire-kirkire na cikin gida na Sin.
Saboda haka, kamfanonin kasa da kasa na yanke shawarar kafa cibiyoyin bincike da kuma yin amfani da tsarin kirkire-kirkire mai karfi na Sin.Wang Li, babbar mataimakiyar shugaban kamfanin Eli Lilly na duniya, kuma shugabar reshen Sin na cibiyar bunkasa magunguna da harkokin likitanci ta Eli Lilly, ta bayyana cewa, a cikin shekaru 10 da suka gabata, karfin kirkire-kirkire na Sin yana ci gaba da karuwa. Eli Lilly kuma na mai da kasar Sin a matsayin muhimmin karfi na kirkire-kirkire a duniya. Kamfanin ya yi alkawarin zuba jari na dala biliyan 3 a cikin shekaru 10 masu zuwa. (Amina Xu)
