Hukumar kwallon kafa ta Nijeriya ta dakatar da mataimakin alkalin wasa Yakubu Aliyu har sai baba tagani, bayan hukuncin da ya yanke da ya janyo aka soke kwallon da Doma United ta jefa a raga a wasansu da kungiyar kwallon kafa ta Enyimba wadda Doma din ta doke takwararta daci 2-0 wasan Mako na uku na gasar Euro Match Premier League ta Nijeriya kamar yadda jaridar Punch ta ruwaito.
An dakatar da Yakubu Aliyu, Alkalin wasa daga jihar Jigawa wanda ya yi aiki a matsayin mataimakin Alkalin wasa na 1 a wasan daga duk wata harka da ta danganci wasan kwallon kafa a tarayyar Nijeriya, daga cikin wata wasika da Mohammed Ameenu, Sakataren Kwamitin Alkalan wasa na NFF kuma Shugaban sashen Alkalin wasa na NFF, ya sanya wa hannu, an sanar da Aliyu cewa an dauki matakin dakatarwar ne bayan tattaunawa da masu ruwa da tsaki.
Wasikar ta bayyana cewa mataimakin alkalin wasan “ya kasa bin ka’idojin jiran yanke shawarar karshe daga masu taimakawa,” wanda hakan ya haifar da soke abin da kwamitin ya bayyana a matsayin ci mai inganci, kwamitin ya kuma zargi hukuncin da jami’in ya yanke wanda ya shafi yadda sakamakon wasan ya kasance, ” Don haka kwamitin Alkalan wasa ya yanke shawarar cewa ya kamata a dakatar dashi, wanda hakan ya janyo aka cire sunanshi daga jerin alkalan wasa da mataimakan alkalin wasa na gasar Euro Match NPFL na wannan shekarar ta 2026/2027,” in ji wasikar.
