Kakakin ma’aikatar harkokin wajen Sin Guo Jiakun, ya bayyana cewa kwanan nan Sin ta baiwa MDD samfurin kasa wanda na’urar bincike ta Chang’e 5 ta debo daga sashe mai nisa na duniyar wata, al’amarin ya nuna goyon baya mai karfi da Sin ke baiwa MDD, da ma hadin gwiwar bangarori daban-daban.
Guo ya ce bangaren Sin na fatan kiyaye dokokin kasa da kasa bisa yarjejeniyar sararin samaniya tare da sauran kasashe, da kuma mayar da sararin samaniya ya zama wani dandali na hadin gwiwa mai amfani na bil’adama.
Ya kuma bukaci Amurka, da ta dakatar da fadada karfin soji da shirye-shiryen yaki a sararin samaniya.Guo ya bayyana hakan ne a gun taron manema labarai na yau da kullum a yau Talata.
Dangane da bikin baje kolin hada-hadar ba da hidima ta kasa da kasa wato CIFTIS na 2026, wanda aka kammala kwanan nan a Beijing kuwa, Guo ya ce taron ya samar da sakamako sama da 1,200, kuma ya samar da sabbin damammaki na hadin gwiwa.
Kazalika, Sin za ta ci gaba da hadewa da kasuwannin kasa da kasa ta hanyar bayar da hidimomi masu inganci, ta tabbatar da cewa, “Ayyukan hidimomi na kasar Sin” suna samar da fa’idodi ga duniya.Bugu da kari, Guo ya kara da cewa, ministan harkokin wajen Iran Abbas Araghchi, zai kawo ziyarar aiki Sin a gobe Laraba. (Safiyah Ma)
