Daren jiya Jumma’a, tawagar likitocin kasar Sin ta 32 da aka kafa bisa jagorancin asibitin Tongren na Beijing da ke karkashin jami’ar Capital Medical University, ta tashi daga Beijing zuwa Konakry, babban birnin kasar Guinea, domin gudanar da aikin agajin likitanci na tsawon watanni 18.
Tawagar ta kunshi ma’aikata 24, masu matsakaicin shekarun haihuwa 41, inda 22 daga cikinsu suka fito daga sassa 19 na asibitin Tongren na Beijing. Kwarewarsu ta shafi fannonin tiyata, ciki har da ta kafa da idon sawu, da ta ciwon kwakwalwa, da ta kashi, da tiyata ta gama-gari, da ta kirji, da tiyatar hanyoyin fitsari, da tiyatar jijiyoyin jini, da kuma fannonin da ba na tiyata ba, kamar su maganin cututtukan jijiyoyi, da cibiyar kula da cututtukan zuciya da jijiyoyin jini, da kuma sashin maganin gargajiya da dai sauransu.
Sauran ma’aikata 2 kuma an zabe su ne daga hukumar kiwon lafiya ta birnin Beijing da cibiyar kandagarki da dakile yaduwar cututtuka ta birnin Beijing, wadanda ke aiki a matsayin mashawarta kan manufofin kiwon lafiya na kasa da kiwon lafiyar jama’a na kasa.
Dukkan ma’aikatan sun riga sun kammala horo na tsawon watanni biyar da kuma cin jarrabawa kafin tashi zuwa kasar Guinea. Za su ci gaba da ba da himma wajen taimaka wa kasar ta fuskar inganta kwarewarta da matsayinta na ayyukan kiwon lafiya a dukkan fannoni, tare da dora muhimmanci kan horar da ma’aikatan lafiya na kasar, domin inganta kwarewar likitocin kasar Guinea. (Bilkisu Xin)
