Kakakin ma’aikatar cinikayya ta kasar Sin, ya yi karin haske game da sakamakon tattaunawar tattalin arziki da cinikayya da bangarorin Sin da Amurka suka gudanar, inda ya ce jerin sakamakon da aka cimma sun hada da na farko, tawagogin biyu za su ci gaba da aiwatar da sakamakon shawarwari, da matsaya mai gamsarwa da aka cimma dangane da tsare-tsaren biyan haraji masu nasaba.
Na biyu, dukkanin sassan sun amince da kafa majalisar cinikayya da ta zuba jari, don tattauna abubuwan da ko wannensu ke mayar da hankali a kai a fannonin cinikayya da zuba jari.
Na uku kuma, sassan biyu za su magance, ko ingiza kawar da shingayen da ba na haraji ba, da batutuwan da suka shafi damar shiga kasuwa ga wasu albarkatun gona.
Na hudu, sassan biyu sun amince da ingiza fadada cinikayya tsakaninsu, a sassan da suka jibanci albarkatun noma ta hanyar tsare-tsare, kamar rage haraji kan jerin wasu hajojin da sassan biyu suke cinikayya tsakaninsu.
Na biyar, sassan biyu sun cimma jerin matsaya dangane da shirin kasar Sin na sayen jiragen sama daga kasar Amurka, da tabbacin da Amurka ta baiwa kasar Sin, game da shigo da injunan jiragen sama, da kayayyakin gyaransu, kana sun amince su ci gaba da ingiza hadin gwiwa da juna a fannoni masu nasaba da hakan. (Mai fassara: Saminu Alhassan)
