Tinubu Ya Dawo Abuja Bayan Taron Kasashen Larabawa Da Musulunci A Riyadh

A ranar Talata ne shugaban kasa Bola Tinubu ya dawo Abuja bayan halartar wani babban taron kasashen Larabawa da Musulunci da ya gudana a birnin Riyadh na kasar Saudiyya.

Tinubu ya sauka a filin jirgin sama na Nnamdi Azikwe da karfe 8 na dare inda manyan jami’an gwamnati suka tarbe shi.

• Shugaba Xi Ya Mika Sakon Taya Murna Ga Zauren Taron Kafafen Yada Labarai Da Kwararru Na Kasashe Masu Tasowa
• ‘Yan Bindiga 3 Da Mai Yin Safarar Makamai Sun Shiga Hannu A Taraba

A yayin babban taron kolin da aka yi a Saudiyya, Tinubu ya yi kira da a kawo karshen hare-haren da sojojin Isra’ila ke yi a Gaza cikin gaggawa.

Tinubu ya yabawa Sarki Salman na Saudiyya da Yarima mai jiran gado Mohammed bin Salman bisa shirya taron, inda ya kira taron a matsayin wani muhimmin mataki na sabunta diflomasiyya don samar da zaman lafiya mai dorewa a yankin.