Tawagar kwallon kafa ta mata ta Nijeriya da yanzu haka ke buga gasar kofin nahiyar Afirika ta mata zata buga wasan karshe a rukunin C ba tareda zakakuran yan wasanta biyu ba, wadanda aka dakatar sakamakon mabanbantan laifuka, yan wasan na Super Falcons sun fuskanci hukuncin a wasan da suka buga da kasar Zambia a ranar Lahadi.
Ƴan wasan biyu da aka dakatar sun hada da Oluwatosin Demehin dake buga baya, da kuma yar wasan tsakiya Jennifer Echegini, duka biyun Alƙalin wasa ya basu kati a wasan da Nijeriya ta doke kasar Zambia da ci 1-0 a ranar Asabar, an bai wa Demehin jan kati kai tsaye a minti na 40 na wasan sakamakon yiwa kyaftin din Zambia Barbra Banda keta, sannan Echegini ta sami katin gargadi na biyu a gasar, wanda hakan ya janyo mata dakatarwar buga wasa daya a karkashin dokokin ladabtarwa na CAF.
Dakatarwar ta zo ne yayin da Nijeriya ke neman samun nasara akan kasar Masar domin kara samun damar zuwa matakin gaba na gasar ta bana, Asisat Oshoala ce ta zura kwallo daya tilo a minti na takwas na wasan na ranar Asabar duk da cewar Nijeriya ta buga sauran mintuna 50 na wasan da Yan Wasa Goma kacal, ta samu nasarar samun maki 3 wanda yayi sanadiyar komawarta zuwa matsayi na biyu a rukunin C.
