A daidai lokacin da ake gudanar da taron koli na kungiyar hadin gwiwa ta Shanghai (SCO), daga yau 31 ga watan Agustan zuwa gobe 1 ga watan Satumba a kasar Kyrgyzstan, kungiyar na cika shekaru 25 da kafuwa.Shin wane tsarin kungiyar ta ginu a kai cikin shekaru 25 da ya sa take habaka da samun ci gaba? Babban abun da wannan kungiya wadda kasashe 6 suka fara kafa ta ta ginu a kai shi ne, girmama dukkannin kasashe, watau dukkannin kasashe masu cin gashin kansu, daidai suke da juna babu uban gida da dan gida.
Haka kuma babu raini ko rashin girmamawa. Hakika, kafuwar wannan kungiya ta kalubalanci tsarin hukumomin yammacin duniya inda kasashen ke cudanya da mu’amala ba tare da zama karkashin ikon wata kasa ba. Kungiyar wadda ta bunkasa zuwa kasashe mambobi 10 da suka hada da Sin da Rasha da Kazakhstan da Kyrgyzstan da Tajikistan da Uzbekistan da India da Pakistan da Iran da Belarus, shaida ce mai wakiltar tsarin inganta shugabancin duniya mai girmama cikakken ikon kasashe da babu tsoma baki ko katsalandan, wadda ke kokarin tabbatar da rarrabuwar iko tsakanin kasashe.
Lallai irin wannan hadin gwiwa ake bukata a duniya domin kowace kasa ta bambanta, don haka ita ce mafi dacewa ta zabarwa kanta hanya da dabarun raya kanta da al’ummarta, maimakon kwaikwayo da zama ’yar amshin shata. Wannan ya haifar da dimbin alfanu ga kungiyar inda hadin gwiwa ta moriyar juna da taimakekeniya da ake yi tsakanin kasashen ya sa suke iya gudanar da harkokin cinikayya cikin takardun kudadensu.
Lamarin da ya saukaka harkokin cinikayya tare da nuna cewa, bai zama wajibi duniya ta dogara da takardar kudin wata kasa guda ba, sannan shaida ce cewa, duniya na bukatar wani tsarin hadin gwiwa mai martaba kowa da tabbatar da adalci da daidaito da cin moriya tare.
Duk da cewa kasashe ne masu mabambantan tsare-tsare da al’adu da ma yanayi, sun jure kalubale da yanayin duniya, inda suka kasance tsintsiya madaurinki daya, masu ingiza ci gaban juna da goyon bayan juna.
Lamarin da ke kara tabbatar da cewa, rarrabuwar iko da daidaito da samun ci gaba tare, ba za su taba zama kalubale ga ci gaban duniya ba, sai ma karfin da zai ingiza dunkulewar duniyar wuri guda. (Fa’iza Mustapha)
