Ministan harkokin wajen kasar Sin, Wang Yi, a jiya Alhamis ya jaddada cewa batun Taiwan abu ne da ya shafi manyan muradun kasar Sin kuma tamkar gidan rina ne mai matukar hadari a cikin alakar Sin da Amurka.
Ya bayyana hakan ne yayin wata tattaunawa ta wayar tarho da sakataren harkokin wajen Amurka, Marco Rubio.
Wang ya ce ya kamata bangarorin biyu su kiyaye kwanciyar hankalin da aka samu da kyar da jibin-goshi, su shirya sosai game da manyan muhimman ajandodi na mu’amalarsu, su fadada fannoni na hadin gwiwa, da magance bambance-bambancensu, su warware takaddama, sannan su lalubo hanyoyin gina dangantaka tsakanin Sin da Amurka wacce take kunshe da manyan tsare-tsare, da alfanu tare da ci gaba mai dorewa, domin samun girmama juna, da zaman lafiya da hadin gwiwa mai amfanar da kowane bangare.
A nasa bangaren, Rubio ya ce dangantakar Amurka da Sin ita ce mafi muhimmanci a dangantakar da ke tsakanin kasa da kasa a duniya, kuma ya kamata bangarorin biyu su ci gaba da tuntubar juna da yin hadin gwiwa, kana su girmama juna, da magance bambance-bambance yadda ya kamata, sannan su kula da yanayin da ake ciki don mu’amala mai zurfi a nan gaba, da kuma neman samun daidaitacciyar dangantaka bisa manyan tsare-tsare tsakanin Amurka da Sin. (Abdulrazaq Yahuza Jere)
