Ministan Babban Birnin Tarayya, Nyesom Wike, ya buƙaci mambobin jam’iyyar PDP da ke Abuja su goyi bayan Shugaba Bola Tinubu da ’yan takarar jam’iyyar APC a zaɓen shekarar 2027.
Wike ya yi wannan kira ne a ranar Laraba, yayin wani taron masu ruwa da tsaki kan harkokin siyasa a Abuja.
Ya ce shi ne ke jagorantar ayyukan yaƙin neman zaɓen Tinubu a Abuja da Jihar Ribas.
Ya kuma buƙaci mazauna Abuja su ɗauki zaɓen da muhimmanci tare da amfani da katin zaɓensu wajen zaɓen Tinubu.
Ya yi alƙawarin cewa za a samar da abubuwan da ake buƙata domin gudanar da yaƙin neman zaɓen.
Wike ya kare matakin cire tallafin man fetur, yana mai cewa matakin ya zama dole, kuma tsadar rayuwa na iya raguwa yayin da gyare-gyaren tattalin arziƙi suka fara daidaita.
Ya kuma bayyana wasu ayyuka da sauye-sauyen da aka gudanar a Abuja, ciki har da gina sababbin ofisoshin ’yansanda, aikin tituna da naɗe-naɗe da nufin inganta tsaro da bai wa mazauna birnin damar shiga cikin gwamnati.
