Wuri na bakwai dake da tsaro na musamman a Duniya shi ne wurin ajiyar kayayyaki na musamman da ake kira da “Iron Mountain”
Shi wannan wuri yana boye ne a karkashin kasa, nisan kafa dari biyu, kuma akwai kofofi daban-daban wanda za su iya jure harin makamin kare dangi na nokiliya, kasashen Duniya da manya manyan kamfanunnuka suna kai takardunsu masu muhimmanci dama bayanan sirrinsu domin wannan guri ya ajiye musu, irin binciken da ake wa mutum kafin ya shiga wannan wuri, idan ma yana da wata ajiya a wurin kenan, sai ya kosa, domin komai da kake tare da shi sai an duba shi, haka kuma mafi yawan mutane da kamfanonin da suka yi ajiya a wannan wuri ba’a bayyana sunaye su.
Guri na takwas dake da matsanancin tsaro a Duniya shi ne wurin da aka ajiye wasu irin abinci na kota kwana da ake kira “Doomsday Seed Bault”.
Shi wannan guri an tsara shi ne akan ajiye iri na abinci kala-kala da tsammanin ko wata masifar yunwa ko ta wani abu za ta fada wa Duniya da za ta sa mutane su rasa abinci, ta wannan guri, kamar yadda suka ce ya tanadi abincin da zai wadaci mutanen Duniya, yana da katanga me kauri sosai, akwai wasu irin makullan tsaro dake amfani da iska da aka yi amfani da su wajen kulle shi haka kuma yana da wata na’ura dake tantance motsin mutum, an gina wurin ya shiga cikin kasa, ya kuma ratsa ta cikin wani dutse, da dai sauran matakan tsaro na musamman, sun ce ko da za’a harba makamin kare dangi na nukiliya kai tsaye a kan wannan guri ba zai ko da gezau ba, kuma wurin ya wuce gwajin girgizar kasa me maki 6.2, don haka sun cika baki akan wannan guri da yawa, sun ce babu abin da zai lalatashi.
Wuri na tara: dake da tsaro na musamman a Duniya shi ne wurin ajiyar gwal na bankin Amurka “Federal Reserbe Bault”. Wannan guri an gina shi kafa 80 karkashin kasa, kuma yana da wani bututu ko kima a ce ma’ajiya wadda ita ta rufe bakin shiga wurin me nauyin da ya wuce tunani, mutum mutumi ake amfani da shi wajen shigar da gwalagwalan da ake ajiyewa a wurin , kuma akwai kwararrun maharba bindiga na gaske da aka ajiye suna jiran kota kwana.
Amurka ta ajiye gwal a wannan guri fiye da wanda ta ajiye a Fort Knod, haka kuma kasashen Duniya da dama su ma sun ajiye gwalagwalansu da yawa a wannan guri saboda yarda da tsaron dake wurin.
Bayan wadannan gurare da akwai kuma wasu gurare dake dake da matsanan tan tsaro kamarsu. Wurin ajiyar gwal na Dubai. Wurin ajiyar gwal na kasar Swizerland. Maboyar tsohon Shugaban kasar Iraki, marigayi, saddam Hussain, an ginata yadda ko da bam din nukiliya ba zai yi mata illa ba, kasar Amurka ta yi ta jefa bamabamai a wurin lokacin da take so ta kama shi amma wurin bai lalace ba, sai da dabara sannan suka samu shiga wurin.
Wurin ajiyar gwal na kasar Iran, shi ma wannan ba ma a san inda ma’ajiyar take ba, saboda barazanar takunkumi da kasar Amurka ke mata. Akwai wani guri shi ma a kasar Brazil da ake kira da tsibirin macizai, shi ma an hana zuwa wurin saboda a kare jinsin macizan daga karewa a doron Duniya.
