A yau Talata shugaban kasar Sin Xi Jinping, ya aike da wasikar bude dandalin hadin gwiwa na Shanghai ko SCO na 2025, game da rage talauci da wanzar da ci gaba, wanda ke gudana a birnin Xi’an, na lardin Shaanxi dake arewa maso yammacin kasar Sin.
Cikin sakon na sa shugaba Xi ya bayyana cewa, rage talauci wanda batu ne da ya shafi duniya baki daya, buri ne na daukacin kasashen duniya. Ya ce duk da cewa aiki ne mai matukar wahala, amma duk da haka kasar Sin ta cimma nasarar rage shi daidai da ajandar samar da ci gaba mai dorewa ta MDD ta nan zuwa shekarar 2030, shekaru 10 gabanin wa’adin karshe na ajandar.
Hakan ya shaida ingancin turba mai halayyar musamman da kasar Sin ke bi wajen rage talauci, tare da rubuta wani sabon babi a tarihin bil’adama ta fuskar yaki da fatara. Daga nan sai shugaban na Sin ya jaddada cewa, karancin ci gaba shi ne tushen talauci, kuma dandalin SCO ya aiwatar da managartan matakai a fannin rage talauci, da wanzar da ci gaba a shekarun baya bayan nan, kuma hakan ya haifar da tarin sakamako masu gamsarwa. (Mai fassara: Saminu Alhassan)
