Shugaban kasar Sin Xi Jinping, da takwaransa na kasar Amurka Donald Trump, sun yi shawarwari a fadar White House da safiyar ranar 24 ga watan nan.
A tattaunawarsu, shugaba Xi ya ce, sabon matsayin dangantakar Sin da Amurka, wato kyakkyawar dangantakar Sin da Amurka mai gudana bisa daidaiton manyan tsare-tsare, ta shaida ainihin halin da ake ciki na raya alakokinsu, tare da nuna kyakkyawan fata a nan gaba, kana muhimmin ci gaba ne da aka samu wajen bin hanya madaidaiciya ta raya dangantakar kasashen biyu. Ya ce ya dace bangarorin biyu su dauki matakai na zahiri don aiwatar da wannnan kyakkyawan fata, a wani kokari na kirkiro kyakkyawar makomar dangantakar Sin da Amurka mai dorewa yadda ya kamata.
Shugaba Xi ya kuma jaddada cewa, matsayin kasar Sin a bayyane yake wajen kiyaye dinkuwarta da cikakken yankinta, tare da fatan Amurka za ta tsaya ga matsayin adawa da yunkurin balle Taiwan daga cikin kasar Sin, da yin tunani mai zurfi game da batun da ya shafi Taiwan, a wani kokari na aza tubali mai inganci ga hadin gwiwar Sin da Amurka bisa manyan tsare-tsare gami da ci gaban dangantakarsu yadda ya kamata.
A daya bangaren, game da batun yankin Gabas ta Tsakiya, shugaba Xi ya nuna cewa, Sin tana ganin cewa, ya kamata a mutunta cikakken ’yanci gami da tsaron duk wata kasa, kuma ta dade tana taka muhimmiyar rawa wajen sassauta yanayin rikicin da ake ciki, da karfafa gwiwar bangarori daban-daban don su bi hanyar lumana, tare kuma da ci gaba da yin shawarwari tsakaninsu.
A nasa bangaren kuwa, Donald Trump ya ce, ziyarar shugaba Xi a Amurka a wannan karo, babbar ziyara ce mai ma’ana sosai. Amurka da Sin kasashe ne manya, kuma shi da shugaba Xi aminan juna ne na arziki, wadanda suka kiyaye tuntubar juna. A karkashin jagorancin shugabannin biyu, alakar Amurka da Sin za ta ci gaba da kyautata.
Shugabannin kasashen biyu sun kuma tabbatar da cewa, za su goya wa juna baya wajen gudanar da kwarya-kwaryar taron shugabannin kasashe membobin kungiyar APEC na shekara ta 2026, gami da taron kolin G20. (Murtala Zhang)
ADVERTISEMENT
