Tsohon Mataimakin Gwamnan Babban Bankin Nijeriya (CBN), Dakta Kingsley Moghalu, ya ƙi amincewa da sanya sunansa a kwamitin yaƙin neman zaɓen shugaban ƙasa na jam’iyyar ADC ƙarƙashin Atiku Abubakar. Moghalu ya bayyana hakan ne a ranar Alhamis ta shafinsa na X, inda ya ce ba a nemi amincewarsa ba kafin a fitar da sunansa.
Moghalu ya nuna mamakinsa kan yadda aka saka shi a tawagar tsara manufofi ta yaƙin neman zaɓen 2027. Ya jaddada cewa: “Don bayyana gaskiya, ba a tuntuɓe ni ba, kuma ban ba da izini na ba. Ba na cikin tawagar Atiku, ko da a matsayin mai ba da shawara ne.”
Wannan na zuwa ne bayan Atiku Abubakar ya fitar da jerin sunayen kwamitin yaƙin neman zaɓensa, inda ya naɗa Kashim Ibrahim-Imam a matsayin shugaba, da Nasir el-Rufai a matsayin mataimaki, sannan ya sanya Moghalu a tawagar manufofi ƙarƙashin Mohammed Hayatu-Deen.
A cewar Atiku, an kafa tawagar manufofin ne domin samar da mafita ga matsalolin da ke damun al’ummar Nijeriya. Sai dai Moghalu ya bayyana cewa jam’iyyar ADC ba ta samu izininsa ba kafin ta bayyana sunansa ga duniya.
A ƙarshe, Moghalu ya bayyana cewa tun shekarar 2022 ya fice daga siyasar jam’iyya domin mayar da hankali kan harkokin bincike a IGETAfrica da Sogato Strategies, yana mai cewa ya zaɓi zama dattijon ƙasa maimakon siyasar ɓangaranci.
