Hukumar Makamashi ta Duniya (IEA) ta kiyasta cewa rikicin da ke tsakanin Amurka da Iran ya haddasa asarar fitar da kusan ganga biliyan 2.8 na ɗanyen mai ta mashigar Hormuz tun bayan fara yaƙin.
A cewar rahoton IEA, jigilar mai ta mashigar Hormuz ta kai kiyasin ganga miliyan 7.6 a rana a watan Agusta, wanda ya yi ƙasa da matakin da ake samu kafin yaƙin da ganga miliyan 13.1 a rana. Sai dai wasu hanyoyin jigilar mai da ke kauce wa mashigar sun taimaka wajen rage gibin.
IEA ta ce ƙarin samar da mai daga ƙasashe kamar Amurka, da Brazil, da Kazakhstan, da Venezuela da Nijeriya ya taimaka wajen maye gurbin ganga miliyan 420 daga cikin asarar da aka samu. Haka kuma, Saudiyya da Hadaddiyar Daular Larabawa sun cigaba da fitar da mai ta wasu hanyoyi.
Hukumar ta ce ragowar gibin ya samu cikawa ne ta hanyar amfani da ajiyayyen mai da kuma raguwar buƙata a duniya. Ta ce ajiyar mai a duniya ta ragu da ganga miliyan 507 idan aka kwatanta da kafin fara rikicin.
IEA ta kuma yi hasashen cewa takaddamar da ke tsakanin Amurka da Iran na iya ci gaba da hana jigilar mai ta mashigar Hormuz cikin sauƙi har zuwa shekarar 2027, yayin da rikicin ke ci gaba da shafar samar da mai da farashin makamashi a duniya.
