Har yanzu magoya bayan Manchester United na cikin farin ciki bayan da kungiyar ta je har birnin Landan ta doke kungiyar kwallon kafa ta Chelsea a filin wasa na Stamford Bridge a wasan firimiyar da suka fafata a ranar Asabar din da ta wuce saboda nasarar ta sake tabbatar wa da United din cewa za ta iya kammala gasar firimiya a mataki na uku daga nan zuwa karshen watan mayu mai zuwa.
Nasarar ta biyo bayan rashin nasarar da kungiyar ta yi a wasanta da Leeds United. Nasarar da Leeds ta samu da ci 2-1 ta sa kungiyar ta koma ta 15 a kan teburin Premier. Kuma ita ce nasara ta farko ta Leeds ta samu kan United a Premier tun shekarar 2002, kuma ta farko da ta samu a Old Trafford tun 1981.
Kocin kungiyar Daniel Farke ya bayyana wa manema labarai irin farin cikin da ya ji sakamakon nasarar. A wata hira da Sky Sports, Farke ya ce wannan ne karon farko da suka ci United a gidansu cikin shekara 40, tabbas wannan babbar nasara ce.
A lokuta da dama manyan kungiyoyin Ingila kan sha kaye a hannun kananan kungiyoyi. Ko a kwanakin baya Arsenal – ta sha kaye a hannun Bournemouth da ke mataki na 11 a kan teburin, ga kuma kungiyar Tottenham da a bana ke cikin barazanar faduwa daga gasar Premier League zuwa ajin gajiyayyu idan har basu tashi tsaye ba.
Ko a watan Agustan 2025 ma wata karamar kungiyar Grimsby Town FC da ke buga gasar League mai daraja ta hudu a Ingila, ta fitar da United daga gasar Carabao a bugun fenareti. Sannan akwai kananan kungiyoyi da dama da suka ba wa manya mamaki a wannan kakar kuma hakan ya nuna karfin da kananan kungiyoyi suke da shi a gasar ta Ingila.
