Shugaban Amurka Donald Trump, yana gudanar da ziyarar aiki a nan kasar Sin. Kuma a yayin wannan ziyara, ‘yan kasuwan Amurka fiye da goma daga fannonin fasaha, da hada-hadar kudi, da jiragen sama, da noma da sauransu sun rako shi kasar Sin.
’Yan kasuwar sun kuma bayyana cewa, nasarar ganawar shugabannin kasashen biyu ta kara shigar da sabon karfi ga hadin gwiwar kasuwanci da tattalin arziki tsakanin Amurka da Sin. Sun kuma yi fatan zurfafa ayyukansu a Sin, da fadada hadin gwiwa da Sin, da kuma yin kokari sosai don inganta fahimtar juna da hadin gwiwa tsakanin kasashen biyu.
Shugaban kamfanin NVIDIA Jensen Huang, ya ce, “Ina ganin Sin a matsayin daya daga cikin manyan tattalin arziki mafi ban mamaki a duniya, tana da karfin kirkire-kirkire sosai, haka kuma tana daya daga cikin manyan kasashe da suka yi gaba a fannin fasahar AI.
Sin tana da kyau sosai.”Shugaban kamfanin Apple Tim Cook a tsokacinsa ya ce, “Na lura cewa al’ummun Sin suna da matukar sha’awar AI da sabbin fasahohi, kuma suna karba da rungumar wadannan sabbin abubuwa da farin ciki. Na ji dadi sosai game da hakan.
”Shi kuwa shugaban kamfanin Coherent Jim Anderson, cewa ya yi, “Ina ganin tattalin arzikin Sin yana da kyakkyawar makoma, kuma tattalin arziki ne mai karfin gaske, makomarsa tana da kyau sosai.” (Amina Xu)
Discussion about this post