Tsohon Mataimakin Shugaban Ƙasa, Atiku Abubakar, ya ce wani bincike da SBM Intelligence ta gudana, ya nuna cewa ’yan Nijeriya da dama na son a dawo da tallafin man fetur.
Atiku ya ce binciken ya nuna cewa kashi 67.4 cikin 100 na waɗanda aka tambaya na goyon bayan dawo da tallafin mai, saboda matsin tattalin arziƙin da ake fuskanta.
Ya soki matakin Shugaba Bola Tinubu na cire tallafin man fetur a shekarar 2023, yana mai cewa hakan ya ƙara farashin sufuri, kayan abinci da kuma kuɗin gudanar da kasuwanci.
Atiku ya ce idan aka zaɓe shi a shekarar 2027, zai ƙaddamar da tallafin man fetur da ake tacewa a cikin Nijeriya.
Ya ce shirin ba zai shafi man da aka shigowa da shi daga ƙasashen waje ba, kuma za a sanya masa iyakar kashe kuɗi tare da sanya Majalisar Dokoki ta sa ido tare da kuma gudanar da bincike mai zaman kansa.
Ya kuma yi kira ga gwamnatin Tinubu da ta ɗauki matakan gaggawa domin rage farashin man fetur da kuma sauƙaƙa halin da ’yan Nijeriya ke ciki.
