Tsohon Gwamnan Jihar Cross River kuma ɗan takarar shugaban ƙasa na jam’iyyar PRP, Donald Duke, ya ce ’yan Nijeriya sun fi samun sauƙin rayuwa a lokacin mulkin soja fiye da yadda suke a ƙarƙashin mulkin farar hula. Ya ce shekaru 27 na mulkin dimokuraɗiyya ba su samar da ingantaccen ci gaban da ya dace da rayuwar ƴan ƙasa ba.
Duke ya bayyana hakan ne yayin wata hira, inda ya ce ya kamata a auna nasarar dimokuraɗiyya ne ta hanyar ingancin rayuwar jama’a, ayyukan more rayuwa da hidimomin da gwamnati ke samarwa. A cewarsa, farashin tafiyar da gwamnati a yanzu ya yi yawa idan aka kwatanta da abin da jama’a ke samu.
Tsohon gwamnan ya ce Nijeriya ta koma mulkin farar hula ne a shekarar 1999, amma a ganinsa, yanayin rayuwar jama’a ya taɓarɓare idan aka kwatanta da lokacin. Ya ce ƙasar na fuskantar matsalolin tattalin arziƙi, da rashin daidaito da kuma rashin ingantaccen tsarin siyasa wanda ke sa dimokuraɗiyya ta gaza samar da abin da jama’a ke buƙata.
Duke ya kuma soki yadda ake gudanar da zaɓuka da tsarin jam’iyyun siyasa a Nijeriya, yana mai cewa matsalolin siyasar ƙasar sun rage amincewar jama’a ga tsarin dimokuraɗiyyar. Ya ce idan dimokuraɗiyyar ba ta inganta rayuwar talakawa ba, to dole ne a tambayi irin ribar da jama’a ke samu daga tsarin.
Sai dai kalamansa sun zo ne a daidai lokacin da Nijeriya ke shirin tunkarar babban zaɓen 2027, yayin da ƴan siyasa ke ci gaba da muhawara kan makomar mulkin ƙasar da irin shugabancin da ya dace da ita.
