Da safiyar yau ranar 2 ga watan Nuwamba, shugaban kasar Sin Xi Jinping ya gana da Sultan na Oman Haitham Bin Tariq Al- Said, wanda yake ziyarar aiki a kasar, a babban dakin taro na jama’a da ke birnin Beijing.
A ganawar tasu, Xi ya nuna cewa, Sin da Oman suna da daddaden zumunci dake da ingantaccen tushe da ma kyakkyawar makoma. Kuma Sin tana fatan hada hannu da bangaren Oman wajen ingiza dangantakar abota bisa manyan tsare-tsare tsakaninsu zuwa sabon mataki, ta yadda al’ummar kasashen biyu za su amfana da ita yadda ya kamata, kana da ba da gudummawa ta a zo a gani ga zaman lafiya da kwanciyar hankali da wadatar yankunan.
Ban da wannan kuma, Xi ya jaddada cewa, ziyarar a wannan karo ta kasance ta farko da Sultan na kasar Oman ya yi a Sin cikin shekaru 48 da kulla huldar diflomasiyya tsakanin kasashen biyu, ziyarar da za ta taka rawar gani a tarihin dangantakar kasashen biyu, da ma ingiza bunkasuwar dangantakar.
Kazalika Xi ya nuna cewa, zaman lafiya da kwanciyar hankali a yankunan na bukatar hadin gwiwar mabambantan bangarori. Ya ce Sin na fatan kara hadin gwiwa da kasashen Larabawa da mambobin kwamitin hadin gwiwar kasashen Gulf na GCC, da suka hada da Oman, domin yin kokari tare wajen dawo da zaman lafiya da kwanciyar hankali a yankin tun da wuri, da kuma samun zaman lafiya mai dorewa.
A nasa bangare kuwa, Haitham ya ce, Sin ta zama babbar kasa ta siyasa da tattalin arziki a duniya karkashin jagorancin shugaba Xi, kuma Sin tana ba da gudummawa mai muhimmanci ga wadata da kwanciyar hankalin duniya.
Ya ce, Sin da Oman na da daddaden zumunci, kuma suna ta girmama juna da amincewa da juna. A cewarsa, Oman tana bin manufar kasar Sin daya tak a duniya, kuma tana goyon bayan Sin wajen kare ikon mallakar kasa da cikakken yankinta.
Yana fatan amfani da zarafin wannan ziyara wajen habaka damammakin hadin gwiwa, da gina dangantakar abokantaka mai kyakkyawar makoma, da kuma ingiza samun ci gaban dangantakar kasashen biyu mai armashi.
Dadin dadawa, an ba da labarin cewa, a yayin ziyarar, bangarorin biyu sun fitar da “sanarwar hadin gwiwa tsakanin Jamhuriyyar Jama’ar Sin da kasar Oman kan zurfafa dangantakar abota bisa manyan tsare-tsare tsakaninsu”.(Amina Xu)
