Gobara ta tashi a Kasuwar Katako ta Kofar Ruwa da ke Kano, inda ta shafi gine-gine da rumfuna 110.
Jami’in hulɗa da jama’a na Hukumar Kashe Gobara ta Jihar Kano, PFS Kabiru Isah Jafaru, ne ya bayyana hakan cikin wata sanarwa da ya rabawa manema labarai a Kano.
Ya ce gobarar ta tashi ne da misalin ƙarfe 7:39 na safiyar ranar, bayan samun rahoto daga wani ɗan kasuwar katako mai suna Alhaji Abba.Jafaru ya bayyana cewa jim kaɗan bayan samun rahoton, an tattaro jami’an kashe gobara daga sassa daban-daban na birnin Kano tare da tura su wurin da lamarin ya faru.
Ya ce bayan isarsu kasuwar, jami’an sun tarar da gobarar ta bazu zuwa sassa da dama, inda ta shafi gine-gine da rumfuna 110.
Sai dai ya bayyana cewa jami’an sun yi nasarar shawo kan gobarar tare da hana ta bazuwa zuwa sauran sassan kasuwar.
Hukumar ta yi kira ga ’yan kasuwa da masu harkokin kasuwanci da su kasance cikin shiri tare da ɗaukar matakan kariya daga gobara, musamman a lokacin hunturu, lokacin da busasshiyar iska da ƙura ke ƙara haɗarin tashin gobara.
Babban Daraktan Hukumar Kashe Gobara ta Jihar Kano ya kuma jaddada muhimmancin yin taka-tsantsan domin kare rayuka da dukiyoyi daga illolin gobara.
