Ƴan bindiga sun kai farmaki a daren Asabar a garin Chacho na ƙaramar hukumar Wurno a Jihar Sokoto, inda suka sace amarya, da ƙawayenta da wasu baƙin biki da suka taru domin shirye-shiryen bikin aurenta da aka tsara za a yi washegari. Shaidu sun ce maharan sun shigo ne da tsakar dare suna harbe-harbe kafin su tafi da matan da suka taru wajen sha’anin wa amaryar.
Rahotanni sun nuna cewa an kasa samun jami’an ƴansanda domin tabbatar da batun, sai dai shugaban jam’iyyar APC na jihar, Hon. Isah Sadeeq Achida, ya tabbatar da cewa an yi garkuwa da mazauna garin, koda yake bai tabbatar ko amaryar na cikin waɗanda aka tafi da su ba. Wannan lamari ya faru ne sa’o’i kaɗan bayan an biya harajin fansa na naira miliyan huɗu da babur ga wasu masu garkuwa a Rabah.
- Sojoji Sun Kama Ƴan Ta’adda 20, Sun Ceto Mutane 17 Da Aka Yi Garkuwa Da Su
- Musulmin da Aka Kashe A Zamfara, Katsina Da Sokoto Sun Ninka Na Kiristoci A Tsakiyar Najeriya: MACBAN
Wani mazaunin yankin, Salisu Wurno, ya bayyana lamarin a matsayin abin takaici, yana mai cewa mata, da yara da tsofaffi sun tarwatse cikin dazuka domin tsira da rayukansu. Ya ce har zuwa yanzu maharan ba su tuntuɓi iyalin amaryar ko shugabannin al’ummar yankin ba, lamarin da ya ƙara tayar da hankulan jama’a game da halin da waɗanda aka sace ke ciki.
Har yanzu hukumomi ba su fitar da sanarwa ba, yayin da mazauna Chacho ke roƙon gaggawar ɗaukar matakin jami’an tsaro domin daƙile yawaitar hare-haren da suka addabi yankin.
Al’ummar garin sun ce tsaro ya ƙara taɓarɓarewa a maƙwabtan yankuna, abin da ya jefa su cikin tsananin fargaba.
