Ɗalibai a faɗin Nijeriya ƙarƙashin jagorancin Ƙungiyar Ɗalibai ta Ƙasa (National Association of Nigerian Students – NANS) sun jinjina wa Gidauniyar Aliko Dangote (Aliko Dangote Foundation – ADF) biyo bayan ƙaddamar da wani sabon shiri na bai wa ɗalibai rabon hannun jari kyauta (free share offer) a manyan kamfanonin rukunin Dangote, a matsayin wani ɓangare na ƙoƙarin ƙarfafa tattalin arziƙin matasa da ilimin harkokin kuɗi.
Ƙungiyoyin ɗaliban sun bayyana wannan mataki ne a babban birnin tarayya, Abuja, yayin wani taron manema labarai da shugabannin ƙungiyar suka gudanar a matsayin wani sauyi mai cike da tarihi da zai bai wa matasa damar mallakar hannun jari da zama masu cin moriyar ribar manyan masana’antu tun suna kan ganiyar karatunsu, maimakon dogaro kawai da tallafin kuɗi na yau da kullum da ke ƙarewa cikin ƙanƙanin lokaci.
A cikin sanarwar yabon da suka fitar, shugabannin ɗaliban sun bayyana cewa shirin zai taimaka ƙwarai wajen koya wa matasa dabarun zuba jari, da tara dukiya, da kuma samun ƴancin cin gashin kai ta fannin tattalin arziƙi, musamman a daidai lokacin da tsadar rayuwa da ƙalubalen kuɗin makaranta ke addabar ɗalibai da iyalai a Nijeriya.
Haka kuma, ɗaliban sun jinjina wa shugaban rukunin kamfanonin Dangote, Alhaji Aliko Dangote, bisa jajircewarsa wajen tallafa wa fannin ilimi da ci gaban matasa ta hanyar gidauniyarsa, suna masu bayyana shi a matsayin babban jigo da ke nuna kishin ƙasa a aikace.
A ƙarshe, ɗaliban sun yi kira ga sauran manyan kamfanoni masu zaman kansu da attajiran ƙasar nan da su yi koyi da wannan sabon salon tallafi na Gidauniyar Dangote, domin samar wa matasa hanyoyin samun kuɗin shiga na dogon lokaci da za su rage dogaro da ayyukan gwamnati bayan kammala karatu.
