Hukumar Makamashi ta Nijeriya (ECN) ta amince da ware Naira biliyan ɗaya domin gudanar da aikin samar da wutar lantarki mai amfani da hasken rana a Jami’ar Tarayya da ke Dutse (FUD), Jihar Jigawa. Aikin na da nufin ƙara inganta samar da wutar lantarki a harabar jami’ar.
An amince da aikin ne ƙarƙashin shirin gwamnatin tarayya na Renewed Hope Solarisation Agenda for Alternative Energy, inda za a girke na’urar samar da wutar lantarki ta hasken rana mai ƙarfin megawatt 0.5 (kilowatt 500). Ana sa ran fara aikin nan ba da jimawa ba, kuma za a kammala shi cikin watanni uku.
Mukaddashin Daraktan Hulɗa da Jama’a na jami’ar, Abdullahi Yahaya Bello, ne ya bayyana hakan a cikin wata sanarwa da aka fitar a Dutse. Ya ce aikin zai ƙara samar da wutar lantarki da za ta taimaka wajen gudanar da Karatu da koyarwa, da habaka bincike da sauran harkokin ilimi a jami’ar.
Sanarwar ta kuma bayyana cewa Hukumar Makamashi ta amince da samar da fitilun tituna masu amfani da hasken rana guda 100 a jami’ar, inda aka riga aka tanadi guda 50 domin fara sanyawa.
Mataimakin Shugaban Jami’ar Dutse, Farfesa Ahmad Mohammed Gumel, ya yaba wa gwamnatin tarayya da Hukumar Makamashi kan shirin. Ya kuma bayyana cewa hukumar na da niyyar haɗa gwiwa da jami’ar wajen gudanar da bincike da samar da sabbin fasahohi a fannin makamashi mai ɗorewa.
