Gwamnatin Jihar Gombe, ƙarƙashin jagorancin Gwamna Muhammadu Inuwa Yahaya, ta biya jimillar kuɗi har Naira biliyan 10.32 (N10.32bn) a matsayin haƙƙoƙin garatuti (gratuity) ga ma’aikatan da suka yi ritaya guda 6,665 a faɗin jihar.
Wannan biyan kuɗaɗe ya shafi ma’aikatan da suka yi ritaya daga ma’aikatun gwamnatin jiha da kuma na ƙananan hukumomi 11 da ke jihar. Matakin na cikin ƙoƙarin da gwamnatin ke yi na share hawayen tsofaffin ma’aikata ta hanyar biyan ɗumbin bashin garatuti da aka shafe shekaru da dama ana bin gwamnatin jihar tun daga gwamnatocin baya.
A yayin jawabi kan batun biyan kuɗaɗen a birnin Gombe, Gwamna Inuwa Yahaya ya jaddada cewa gwamnatinsa ta maida hankali wajen ganin an biya masu ritaya haƙƙoƙinsu cikin mutunci da daraja, domin nuna godiya ga irin sadaukarwar da suka yi a lokacin da suke kan ganiyar aikin gwamnati, tare da sauƙaƙa musu ƙalubalen tattalin arziƙi.
A nata ɓangaren, Ƙungiyar ƴan Fansho ta Ƙasa (Nigeria Union of Pensioners – NUP) reshen Jihar Gombe ta nuna gamsuwa da farin ciki, tare da jinjina wa gwamnatin jihar bisa cika alƙawarin da ta ɗauka na biyan kuɗaɗen a tsanake, wanda hakan ya kawo sauƙi ga rayuwar ƴan fanshon da iyalansu.
