Manyan ƙungiyoyin ƙwallon ƙafa na Turai, Real Madrid da Bayern Munich, za su kara a daren yau Laraba a filin Allianz Arena da ke birnin Munich na ƙasar Jamus, a wasan zagaye na kusa da na kusa da na ƙarshe na gasar UEFA Champions League.
Masu sharhin wasanni na kallon wannan wasa a matsayin ɗaya daga cikin mafi zafi a kakar bana, ganin cewa duka ƙungiyoyin suna da tarihin nasarori masu ƙarfi. Bayern Munich ta lashe kofin sau shida, yayin da Real Madrid ke kan gaba da kofuna 15.
Barcelona Ta Ɗare Kan Teburin Laliga Bayan Doke Real Sociedad
Da Ɗumi-ɗumi: Mbappe Ba Zai Buga Wasan Real Madrid Da Benefica Ba
A tarihin haduwarsu sau 37, Bayern Munich ce ke da rinjaye da nasara sau 16, yayin da aka tashi canjaras sau shida, Real Madrid kuma ta samu nasara sau 15, abin da ke nuna irin kusancin karfin da ke tsakaninsu.
Sai dai duk da wannan tarihin, Real Madrid na da ƙwarewa a irin wannan mataki na gasar, inda ta kan nuna ƙarfi musamman a wasannin fitar da gwani, ciki har da lokacin da ta fitar da Bayern Munich a 2023.
A gefe guda, Bayern Munich na da burin ɗaukar fansa da kuma tabbatar da ikon ta a gida, lamarin da ke ƙara zafafa wannan gasa da ake jira da ɗokin gani.
