Mata, Ko Kun San Waɗannan Abubuwan Game Da Mazajenku?
Yau tsaraba ce ga mata kan abubuwan da ya dace su sani game da mazajensu na aure.
Da farko kafin mu yi nisa, ya kamata mace ta yarda mijinta shi ne shugaba a gareta (wannan wajibi ne ba zaɓi ba), ko da kuwa ta girme shi da shekaru, ko ta fi shi kuɗi, ko ilimi, ko matsayi, ko ƙarfi kodai wani abu na rayuwa. Ki tuna fa shi ne ya je har gidanku ya nuna sha’awar kasancewa tare da ke na tsawon wani lokaci da ba shi da ƙarshe sai fa in mutuwa ta zo.
Shi ne yake da haƙƙin kula da ke dangane da ci, sha, tufafi, matsuguni da kuma biya miki buƙatar da babu wanda ya isa ya biya miki ban da shi.
Akwai abubuwa da dama waɗanda mata ya kamata su sani game da mazajensu, ga kaɗan daga cikin su kamar haka:
Yin ƙasa da sauti in kina magana da shi: Mace tagari ita ce wacce ba ta ɗaga muryarta idon tana magana da mijinta, ko da kuwa ranta ya ɓaci. Yin hakan zai iya fusata shi kuma ta yiwu ma har ya yi abin da bai kamata ba. Idon kika fahimci cewa ya hau sama wato ransa ya ɓaci, sai ke kuma ki sauko ƙasa.
Ki ba shi haƙuri in kin yi masa laifi: Dole ne mace in ta yi laifi ta bada haƙuri. Wasu matan in sun yi laifin ma aka faɗa musu sai su fara musu, suna ƙoƙarin kare kansu. Mace tagari ita ce wacce in ta yi laifi za ta yarda ta yi kuma ta bada haƙuri.
Ɗaukar shawararsa: Idan mijinki ya ba ki shawara a kan wani abu ya kamata ki girmama ra’ayinsa in har bai ci karo da addinin ba. Wannan shi zai tabbatar masa da cewa kina girmama shi.
