A yau Jumma’a, ma’aikatar kula da masana’antu da fasahar sadarwa ta kasar Sin ta sanar da cewa, tun daga farkon wannan shekara, aikin gina hanyar sadarwa ta fasahar 5G na kasar Sin na tafiya ba tare da tangarda ba. Kuma ya zuwa karshen watan Yuli, jimillar masu amfani da wayar salula na manyan kamfanonin sadarwa guda uku, wato China Mobile, da China Unicom, da kuma China Telecom, da kuma na kamfanin China Broadnet na kasar Sin ya kai biliyan 1.847, inda yawan masu amfani da wayar salula mai fasahar sadarwar 5G ya kai biliyan 1.303, wanda ya dauki kashi 70.5% na dukkan masu amfani da wayar salula.
Bayanan sun kuma nuna cewa, a watanni 7 na farkon shekarar da muke ciki, aikin gina sabbin ababen more rayuwa na zamani a wannan bangare ya gudana yadda ya kamata. Ya zuwa karshen watan Yuli, jimillar manyan tashoshin sadarwa na 5G ta kai miliyan 5.154, adadin da ya karu da dubu 316 idan aka kwatanta da na karshen shekarar da ta gabata.
Haka kuma, yawan datan katin wayar salula da aka yi amfani da shi ya karu cikin sauri. A watanni 7 na farkon bana, jimillar datan katin wayar salula da aka yi amfani da shi ta kai GB biliyan 258.7, wadda ta karu da kashi 17.6% idan aka kwatanta da ta makamancin lokaci na shekarar da ta gabata. (Amina Xu)
