A makon jiya ne Editanmu Bello Hamza ya tattauna da Alfa Ahmad Musa wani matashi da ya yi watsi da fafutukar neman aikin gwamnati duk da yana da digiri biyu a makatun boko. Maimakon neman aikin gwamanti ya kafa kamfani nasa na kansa, inda ya kirkiro da manhajar da za ta taimaka wa ‘yan kasuwa gudanar da harkokin su cikin aminci. Ga dai yadda hirar ta kasance:
Da farko za mu so ka gabatar da kanka
Sunana Alfa Ahmad Musa mazaunin Legas amma haifaffen Zariya ne, na yi karatu a Jami’ar Ahmadu Bello na karanta ‘Computer Science’, sannan na je mataki na gaba inda na yi digree na biyu a kan ‘Project Management da System Thinking’ da kuma ‘System Analysis’, bayan haka yanzu ina da cikakken kwarewa a kan ‘Network Defence’ da kuma ‘Serber Security’, da wannan ilimin ne na yanke shawarar kafa kamfanin da zai taimaki mutanenmu na Arewa.
Kwanan nan kuka gabatar da wani gagarumin taro wanda kuka kira ‘yan kasuwa don fadakar da su kan hanyoyin yin kasuwanci ta kafofin sadarwa na zamani, ya taron ya kasance?
Alhamdu lillahi, taro ne gagarumi da muka gayyaci ‘yan kasuwa da yawa da ke Zariya da kewaye sannan kuma muka gayyaci masana wadanda suka dade a harkar, suka zo suka ba su shawarwari suka gaya musu yadda kasuwanci ya kamata ya kansace a wannan zamanin. Sannan mun kuma gabatar musu da manhajar mu ta SAYARWA wanda amfani da shi zai taimaka musu sosai wajen gudanar da harkokin kasuwancin su.
To yaya martanin matasa ‘yan kasuwa na Zariya?
Wato mun ga martani sosai, na jin dadi daga wurin matasa, ba ma matasa kadai ba har ma wakilan kungiyoyin ‘yan kasuwa sun nuna mana jin dadinsu saboda mun fadakar da su sosai, masana sun fadakar da su sosai kan abubuwa da dama, an kuma fadakar da su a kan bukatar Sanya gaskiya da rikon amana a yayin gabatar da kasuwancin su.
To wane kira kake da shi ga gwamnati da al’umma da masu hannu da shuni wajen ganin an bunkasa ilimin matasa a wannan bangare?
Wato kiran da nake da shi ga gwamnati da mutane da masu hannu da shuni shi ne, ya kamata a ce yanzu mun gane cewa, lokaci ya yi da za mu rika gina abubuwan da suka shafe mu da kasarmu, mun dade muna gina rungumar abubuwan da suka fito daga kasashen waje wanda hakan sai ya gina kasashen wasu. Ya kamata a karfafa wa matasa don sus amu kwarin gwiwar tsayawa da kafafunsu. Ya kuma kamata gwamnati ta kawo musu dauki da tallafin jari.
Jama’a na dari-dari game da gudanar da kasuwanci ta Intanet saboda ‘yan damfara, mene ne shawarar ka?
To shi ya sa muka ce wata gada ce da muka tsallaka daga inda muke kasuwanci na da zuwa yadda muke kasuwanci na zamani, wato duk wani dan kasuwa da za mu dora a kan Manhajarmu ta Sayarwa sai mun tabbatar da cewa mun san shi, shi ya sa kuma muke tara ‘yan kasuwa wadanda akwai sanayya tsakaninmu da su wanda ba za ka iya cutar wani mutum ba,ko ko an samu matsalar muna hanyoyin tabbatar da ka shiga hannu.
Mun gode sosai
Nima na gode
