Tsohon Mataimakin Shugaban Ƙasa kuma ɗan takarar shugaban ƙasa na jam’iyyar ADC, Atiku Abubakar, ya zargi gwamnatin APC da yin watsi da jin daɗin malaman Nijeriya.
Atiku ya ce hauhawar farashin kayan abinci, sufuri, haya da wutar lantarki na sanya rayuwa ta yi tsauri ga malamai da iyalansu.
Ya yaba wa malaman Nijeriya bisa irin rawar da suke takawa wajen ilimantar da al’umma da kuma gina makomar ƙasa, yana mai cewa sun cancanci ƙarin albashi da kyakkyawan yanayin aiki.
Atiku ya kuma soki Shugaba Bola Tinubu, inda ya ce gwamnati ya kamata ta ƙara ƙoƙari wajen inganta rayuwar malamai maimakon yaba musu kawai.
Ya yi alƙawarin cewa idan ADC ta kafa gwamnati, za ta inganta albashin malamai, inshorar lafiya, samar da gidaje masu sauƙin haya da kuma ba su damar samun ƙarin horo.
Kwamitin Yaƙin Neman Zaɓen ADC ya kuma bayyana malaman Nijeriya a matsayin jarumai da ke ci gaba da aiki duk da rashin kyakkyawan yanayi, jin daɗi da kuma matsalolin da suke fuskanta.
