Ƙasar Amurka ta hannun hukumar Kasuwanci ta tsaurara matakan kasuwanci a kan Nijeriya ta hanyar ɗorawa kayayyakin da ake shigarwa Amurka daga Nijeriya harajin kaso 12.5%. Matakin ya biyo bayan zarge-zargen da ke da alaƙa da rashin kakkabe amfani da aikin tursasawa (forced labour) a ɓangaren sarrafa kayayyaki.
Wannan sabon mataki na ɗaya daga cikin matakan da Washington ta ɗauka kan tattalin arziƙin kasashe 60 da take zargi da gaza kafa dokoki masu tsauri wajen hana shigar da kayayyakin da aka kera wa ta hanyar aikin tursasawa ma’aikata.
Sakamakon Binciken Part 301 (Section 301 Investigation)
A cewar Hukumar USTR, tsarin ƙaƙaba harajin ya biyo bayan gudanar da bincike na Section 301 da aka ƙaddamar a watan Afrilu 2026 domin duba tsare-tsaren kasuwanci na abokan hulɗar Amurka.
- Kaso 10% (Rage Haraji): Ƙasashen da suka riga suka amince ko suka ɗauki alƙawarin aiwatar da dokar hana shigar da kayan aikin tursasawa kamar Indiya, da Indonesiya, da Malesiya, da Mekisiko, da Birtaniya an sa musu ƙaramin haraji na kaso 10%.
- Kaso 12.5% (Tsananta Haraji): Nijeriya da sauran ƙasashen da ba su kafa irin waɗannan dokoki na hana amfani da aikin tursasawa ba, an ɗore musu mafi haraji wato kaso 12.5%.
“Shugaba Trump ya fahimci cewa shekaru da dama ana rarrashi amma har yanzu ba a goge amfani da aikin tursasawa daga tsarin samar da kayayyaki na duniya ba. Amurka tana da dokar hana shigar da kayan aikin tursasawa kusan shekaru ɗari da suka gabata. Lokaci ya yi da abokan kasuwancinmu za su yi hakan.” — Jamieson Greer Wakilin Kasuwancin Amurka ya shaida.
Abubuwan Da Aka Dauke Wa Wannan Haraji (Exemptions)
Hukumar USTR ta bayyana cewa harajin ba zai shafi dukkan kayayyaki ba. An ɗauke wasu rukuni na musamman domin gujewa matsala a kasuwar Amurka:
- Danye Kayan Aiki (Raw Materials): Waɗanda rashinsu zai iya haifar da ƙarancin kayayyaki a cikin gida.
- Kayayyakin Da Ba A Samu A Amurka: Kayan da ba za a iya samunsu a wadatar da ake buƙata daga Amurka ko daga sauran ƙasashe ba.
- Kariyar Tattalin Arziki: Kayayyakin da sanya musu harajin zai iya tarwatsa kafaffiyar hanyar kasuwancin Amurka.
Tasiri A Kan ‘Yan Kasuwar Najeriya
Koma dai cewa Najeriya tana da dokoki na tsarin mulki da na yaki da bautar da mutane da suka haramta aikin karfi, rashin tsaurara aiwatar da dokokin na ci gaba da zama babbar matsala a idon duniya.
Wannan mataki na Amurka na iya kara matsa lamba ga ‘yan kasuwa masu fitar da kayayyaki daga Najeriya zuwa kasashen waje, wanda sakamakonsa ya dogara ne kacokan kan nau’ikan kayayyakin da za su samu rangwame karkashin yarjejeniyar.
