An bude gasar wasannin motsa jiki ta mutum-mutumin inji masu siffar dan Adam ta duniya karo na biyu, a nan birnin Beijing jiya Asabar da dare. Gwamnatin birnin Beijing, da babban rukunin gidajen rediyo da talabijin na Sin wato CMG, da kungiyar hadin gwiwar mutum-mutumin inji ta duniya ne suka dauki nauyin shirya gasar.
Gasar wasannin za ta dauki kwanaki biyar kuma ta hada da shirye-shirye 51, wadanda suka kunshi gasar wasanni da kuma gasar da ta shafi yanayi da sauransu. Kuma an samu wasu sabbin shirye-shirye a cikin gasar wasanni kamar wasan ja-in-ja da wasan Pitch-pot, da wasan daukar kaya masu nauyi, yayin da gasar da ta shafi yanayi ta kara wasu shirye-shirye kamar shirya tufafi a gida, kashe gobara a wurin ceto na gaggawa, da kuma shirya abinci a wurin sayar da kayayyaki. Mutum-mutumin injin da suka shiga gasar za su kasance “masu cin gashin kansu,” da “kwarewa,” kuma “masu amfani.”
Gasar wasannin ta jawo hankalin kungiyoyi 666 da mutum-mutumin inji 2056 daga kasashe 16, ciki har da Sin, Amurka, Jamus, Japan, da Brazil. Adadin kungiyoyin da suka shiga gasar ya karu da kashi 138% idan aka kwatanta da na gasar da ta gabata, kuma adadin mutum-mutumin inji ya karu inda ya ninka sau hudu. Bugu da kari, a lokacin gasar, CMG zai yi amfani da fa’idodinsa na watsa shirye-shirye cikin harsuna 85, da kuma albarkatun dandamali masu karfi don nuna karfi da kuzarin masana’antar kere-keren mutum-mutumin inji ta Sin ga duniya. (Safiyah Ma)
