An gudanar da taron tattaunawar kasa da kasa mai jigon “Jagorancin Kasar Sin da Ci Gaban Duniya” a kasar Kuwait a ranar 3 ga watan nan da muke ciki, wanda babban rukunin gidajen radiyo da talabijin na kasar Sin CMG, da ofishin jakadancin Sin a Kuwait, da kungiyar sada zumunta tsakanin Kuwait da Sin suka shirya tare.
Shugaban CMG Shen Haixiong ya yi jawabi ta bidiyo. Kazalika, jakadan Sin a Kuwait Yang Xin, da gimbiya Sheikha Al-Anoud Al-Ibrahim Al-Duaij Al-Sabah daga gidan sarautar Kuwait, wadda kuma ita ce shugabar kungiyar sada zumunta tsakanin Kuwait da Sin, sun halarci taron kuma sun gabatar da jawabai.
Baki sama da dari daga bangaren ilimi, da masana’antu da kasuwanci, da kafofin yada labarai da kuma wakilan daliban jami’o’i na kasashen biyu sun yi tattaunawa mai zurfi kan dabaru da basirar matakan gudanar da harkokin Sin, da ci gaban Sin da Kuwait bisa mayan tsare-tsare, da kyakkyawar makomar hadin gwiwarsu.
A wurin taron, an kuma nuna bidiyoyin tallata fina-finai da shirye-shirye masu inganci da CMG ya shirya, domin nuna wa baki nasarorin fasahar kere-kere ta zamani da ci gaba mai inganci na Sin.(Amina Xu)
