An gudanar da taron tattaunawa na bude kofa mai inganci don kyautata zaman rayuwar jama’a a fannin samar da abinci a duniya, a rumfar kasar Sin na dandalin tattaunawa kan tattalin arzikin duniya na Hongqiao karo na 9, wanda ya gudana ranar Alhamis a birnin Shanghai na kasar Sin. Ma’aikatar kula da harkokin cinikayya ta kasar Sin ce ta karbi bakuncin taron, tare da cibiyar tsara shirye-shiryen aikin gona da raya kauyuka na babban gidan rediyo da telebijin na kasar Sin CMG da jami’ar nazarin ilmin tattalin arziki da cinikayya na kasashen waje ta kasar Sin.
Wakilan hukumomin gwamnati da shugabannin kungiyoyin kasa da kasa da shugabannin kamfanonin aikin gona da samar da abinci da masana, da adadinsu ya kai kimanin 300 ne suka halarci taron.Mahalarta taron sun yi musayar ra’ayoyi a fannonin makomar bunkasar kayayyakin aikin gona da abinci, da saukaka harkokin cinikayya, da kyautata hanyoyin samar da kayayyaki, da tabbatar da ingancin tsarin samar da hatsi da sauransu, wanda ya samar da dandalin mu’amala da hadin gwiwa a bangaren aikin gona da samar da abinci, na Sin da kasashen waje baki daya.
Wani masani dan Afrika na kwalejin masana’antu na kasar Sin, kuma manazarci a sashen nazarin albarkatu iri na Nanfan na kwalejin kimiyyar aikin gona ta kasar Sin, kana tsohon shugaban kwalejin kimiyya da fasaha ta nahiyar Afirka Felix Dapare Dakora, wanda ya fi maida hankali ga hadin gwiwar kimiyya da fasahar aikin gona tsakanin Sin da Afirka, ya bayyana cewa, yana fatan za a yi amfani da tsibirin Hainan mai yin ciniki cikin ‘yanci da dandalin nazari na Nanfan, wajen zurfafa hadin gwiwa a fannonin inganta iri, da fasahohin zamani na aikin gona da raya aikin gona a yankuna masu zafi da sauransu, ta yadda za a kara shigar da kayayyakin gona da abinci daga kasashen Afirka zuwa kasar Sin. (Zainab Zhang)
