Shugaban hukumar shirin raya kasa ta MDD Alexander De Croo, ya ce ya fahimci karfin Sin da manufofinta na bude kofa ga kasashen duniya da kuma bude kasuwarta ga duniya baki daya.
Alexander De Croo ya bayyana haka ne yayin wata hira da ya yi a baya bayan nan da wakiliyar babban gidan rediyo da telebijin na kasar Sin (CMG). De Croo wanda ya ce ya halarci bikin kaddamar da baje kolin kayayyakin da ake shigowa da su kasar Sin wato CIIE, ya yi nuni da cewa, babban burin bikin CIIE shi ne shigar da kayayyaki da hidimomi kasuwar kasar Sin, wanda ya karfafa wa sauran kasashe gwiwar yin cinikayya.
Ya ce gwamnatin kasar Sin ta soke harajin kwastam ga kasashen duniya masu karancin ci gaba da kuma kasashen Afirka, lamarin da ya kasance misalin bude kofa da sa kaimi ga cinikayya tsakanin Sin da kasashen duniya.
Kuma hakan zai taimaka wa wadannan kasashe su shirya yin ciniki da kasar Sin, da kawo moriya ga kasar Sin, da kuma sauran yankunan duniya baki daya. A cewarsa, muhimmin abu da ake bukatar tattauna a halin yanzu shi ne, yadda za a taimaka wa kasa da kasa su kyautata tsarin raya tattalin arziki da sana’o’i da kansu, da kirkiro yanayi mai dace na zuba jari da jawo jari daga ciki da wajen, da kuma samar da ayyukan yi baki daya. (Zainab Zhang)
