Mataimakin firaministan kasar Sin He Lifeng, kuma jagoran bangaren Sin kan harkokin tattalin arziki da cinikayya tsakaninsa da Amurka, ya tattauna ta bidiyo da sakataren baitulmalin Amurka Scott Bessent, da wakilin Amurka kan cinikayya Jamieson Greer, a jiya Juma’a.
Bangarorin biyu sun yi musayar ra’ayi mai zurfi da ma’ana game da aiwatar da muhimmiyar matsayar da shugabannin kasashen biyu suka cimma a ganawar da suka yi a Beijing da Washington, da kuma sakamakon tuntubar juna game da tattalin arziki da cinikayya da ma manyan batutuwan cinikayya da tattalin arziki da ke jan hankulansu.
Bangaren kasar Sin ya bayyana matukar damuwa game da wasu takunkuman tattalin arziki da cinikayya da Amurka ta sanya masa.
Bangarorin biyu sun amince cewa, karkashin jagorancin shugabannin kasashen biyu, za su kara amfani da tsarin tuntubar juna kan tattalin arziki da cinikayya, da ci gaba da karfafa hadin gwiwarsu da hakuri da bambace-bambancensu yadda ya kamata, domin raya danganatakar tattalin arziki da cinikayya tsakanin kasashen biyu cikin kwanciyar hankali, da kuma bayar da gudunmuwa ga gina dangantaka mai ma’ana da muhimmanci tsakaninsu, bisa girmama juna da adalci da daidaito. (Mai fassara: Fa’iza Mustapha)
