An Jibge jami’an tsaro sosai a cibiyar tattara sakamakon zaben jihar da ke Yola, babban birnin jihar Adamawa yayin da jami’an hukumar zabe mai zaman kanta ta kasa (INEC) za su ci gaba da zama kan tattara sakamakon zaben jihar.
Babban sakataren hukumar zabe ta INEC a jihar, Adamu Gujungu, wanda aka ba da umarnin ya maye gurbin tsohon kwamishinan zabe Hudu Yunusa Ari, an ganshi a cibiyar tattara sakamakon zaben.
Ana sa ran kwamishinan INEC na kasa kuma shugaban kwamitin yada labarai da wayar da kan masu kada kuri’a, Festus Okoye a wurin tattara sakamakon zaben.
A ranar Lahadi ne INEC ta dakatar da tattara sakamakon zaben gwamnan jihar Adamawa da aka gudanar a ranar Asabar bayan Hudu Ari ya bayyana Aisha Binani Dahiru ta jam’iyyar APC a matsayin wacce ta lashe zaben gwamnan jihar ta kuma kayar da gwamna mai ci a jihar Ahmadu Fintiri na jam’iyyar PDP.
Nan take INEC ta gayyaci Ari zuwa Abuja tare da ayyana sanarwarsa a matsayin wacce bata da ce ba kuma mara inganci.
