Gwamnatin Jihar Kano ta kama mutane sama da 380 da ake zargi, tare da samun hukuncin kotu kan fiye da 230 daga cikinsu, a cikin watanni biyu na fara tsaurara yaki da shaye-shayen miyagun kwayoyi da safarar haramtattun kwayoyi a jihar.
Gwamnan Jihar Kano, Abba Kabir Yusuf, ne ya bayyana hakan a ranar Alhamis yayin jawabinsa a wajen bikin cika shekaru 66 da samun ’yancin kan Nijeriya, wanda aka gudanar a filin wasa na Sani Abacha, Kano.
Gwamnan ya ce: “Mun kama mutane sama da 380 da ake zargi, kuma mun samu hukuncin kotu kan fiye da 230 daga cikinsu a cikin watanni biyu na yakin da jihar ta tsaurara kan shaye-shayen miyagun kwayoyi da safarar haramtattun kwayoyi.”
Ya bayyana cewa gwamnatin jihar ta kafa Rundunar Hadin Gwiwa ta Hukumomi da dama kan Shaye-shayen Miyagun Kwayoyi da Safarar Haramtattun Kwayoyi a watan Yulin 2026, tare da fitar da umarnin zartarwa domin kara karfafa yaki da safarar miyagun kwayoyi, daba da sauran laifukan da suka shafi hakan.
Gwamnan ya ce rundunar ta kuma tarwatsa wuraren da ake sayarwa da shan miyagun kwayoyi da kuma maɓoyar masu aikata laifuka a sassa daban-daban na jihar tun bayan kafa ta.
Ya bayyana yaki da shaye-shayen miyagun kwayoyi da aikata laifuka a matsayin nauyin da ya rataya a wuyan kowa, wanda ya shafi gwamnati, hukumomin tsaro, sarakuna, shugabannin addini, al’umma, iyaye da sauran jama’a.
Gwamnan ya yi kira ga matasa da su guji shaye-shayen miyagun kwayoyi, tashin hankali da aikata laifuka, yana mai karfafa musu gwiwa da su rungumi ilimi, noma, fasahar zamani, sana’o’i da koyon sana’o’in hannu.
