A ranar Laraba ne Sanata mai wakiltar Kano ta Kudu, Abdulrahman Suleiman Kawu Sumaila, ya bayyana ficewarsa a hukumance daga jam’iyyar NNPP zuwa APC mai mulki.
Shugaban majalisar dattawa, Godswill Akpabio ne ya karanta wasikar ficewar Sanata Sumaila a zauren majalisar a ranar Laraba.
- Ku Guji Rubuta Rahoton Farfagandar ‘Yan Ta’adda Mai Ɗaukar Hankali – Gwamnati Ga ‘Yan Jarida
- Kwanaki 40: Iyalan Maharban Da Aka Kashe A Edo Na Neman A Biya Su Diyya
A cikin wasikar, Sanatan ya yi amfani da sashe na 68(1) (g) na Kundin Tsarin Mulki na 1999 (kamar yadda aka yi wa gyara), wanda ya bai wa ‘yan majalisa damar ficewa daga jam’iyyunsu na siyasa idan aka samu rabuwar kai a cikin jam’iyyun da suka samu madafun iko acikinsu.
Sumaila, tsohon mataimaki na musamman ga shugaban kasa Muhammadu Buhari kan harkokin majalisar dokokin kasar, ya bayyana jam’iyyar NNPP a matsayin “jam’iyyar da ke da rabe-rabe da tabarbarewar al’amura, inda ya ce, rikicin da ya dabaibaye Jam’iyyar a fili yake babu mai musantawa, wadanda suka hada da shari’o’i a kotuna da dama da kuma gwagwarmayar shugabancin jam’iyyar.”
A karshe, Sumaila ya kafa uzuri a karkashin doka ta 42, inda ya bayyana godiyarsa ga takwarorinsa da jama’ar mazabarsa, inda ya yi alkawarin kara zage damtse wajen gudanar da ayyukansa na ‘yan majalisu domin yi wa kasa hidima.
