A ranar Juma’a 14 ga watan nan ne aka kaddamar da wani shirin telebijin mai taken “Sha’awar Xi Jinping Ga Al’adu” da harshen Azerbaijan, wanda babban gidan rediyo da telebijin na kasar Sin wato CMG ya tsara, ya fassara ya kuma gudanar da bikin fara kallonsa a birnin Baku, fadar mulkin kasar Azerbaijan.
An fara watsa shirin ta kafar sashen al’adu na gidan rediyo da telebijin na kasar Azerbaijan, da gidan telebijin na ARB24 na kasar.Shirin “Sha’awar Xi Jinping Ga Al’adu” ya yi bayani game da yadda shugaba Xi Jinping ke mayar da hankali ga raya al’adu, da tunaninsa kan raya kasa, da al’ummar kasar ta hanyar raya al’adu, da kuma kaunarsa ga abubuwan al’adu da tarihi da aka gada, kana shirin ya nuna wa masu kallo tunanin shugaba Xi Jinping kan al’adu, da tunaninsa kan tafiyar da harkokin kasa da siyasa baki daya.
Jakadar Sin a Azerbaijan Lu Mei, ta ce a shekarun baya-bayan nan, bisa manufofin da shugaban kasar Sin Xi Jinping, da shugaban kasar Azerbaijan Ilham Heydar oglu Aliyev suka cimma, an daga dangantakar dake tsakanin Sin da Azerbaijan a dukkan fannoni, zuwa matsayin dangantakar abokantaka bisa manyan tsare-tsare.
Ta ce, gabatar da wannan shiri na “Sha’awar Xi Jinping Ga Al’adu” a Azerbaijan, ya alamta matakin raya hadin gwiwar kafofin watsa labaru na kasashen biyu zuwa sabon mataki, da taimakawa jama’ar Azerbaijan, ta yadda za su kara fahimtar tunanin Xi Jinping kan al’adu, da kuma tunaninsa kan tafiyar da harkokin kasa da siyasa. (Zainab Zhang)
