Kwanan nan ne, babban rukunin gidajen rediyo da talabijin na kasar Sin ko kuma CMG a takaice, ya shirya taron share fagen shagalin murnar shiga sabuwar shekarar gargajiya ta kasar Sin a hedikwatar Majalisar Dinkin Duniya da ke New York na kasar Amurka. Mataimakin shugaban sashin fadakar da al’umma na kwamitin kolin jam’iyyar kwaminis ta kasar Sin, wanda kuma shi ne shugaban CMG, Shen Haixiong, da mai taimaka wa babban magatakardan MDD kan harkokin watsa labarai na duniya, Melissa Fleming, sun gabatar da jawabai ta kafar bidiyo. Kana, mataimakiyar babban magatakardan MDD, Amina Mohammed, da sauran wasu jami’ai masu taimaka wa babban magatarkdan MDD guda biyu, ciki har da Movses Abelian da Gilles Michaud, tare da wakilin dindindin na kasar Sin da ke majalisar, Fu Cong, sun aike da sakwannin fatan alheri ta kafar bidiyo.
Mista Shen Haixiong ya bayyana cewa, har tsawon shekaru 43 a jere CMG yana shirya shagalin kade-kade da raye-raye na murnar shiga sabuwar shekarar gargajiya ta kasar Sin, shagalin da ya riga ya kasance wani muhimmin abun da zai kayatar da mutanen kasar Sin a duk fadin duniya a jajibirin sabuwar shekara. A bana kuma, shgalin CMG zai yi amfani da wasu sabbin fasahohin zamani, ciki har da 5G+4K/8K+AI, da harsunan waje guda 85, a wani kokari na gabatar da wani shagali mai nishadantarwa ga masu kallo a duk fadin duniya baki daya.
Har wa yau, a ranar 12 ga watan Fabrairu, an yi irin wannan taro na share fagen shagalin CMG na murnar shiga sabuwar shekarar gargajiya ta kasar Sin a birnin Hamburg na kasar Jamus. (Murtala Zhang)
