Shugabar babban taron Majalisar Dinkin Duniya (MDD) na 80, Annalena Baerbock, a kwanan nan ta shaida wa wakiliyar CMG cewa kasar Sin ba wai kawai daya ce daga cikin wadanda suka kafa MDD ba, har ma daya ce daga cikin mafi goyon bayan tsarin damawa da mabambantan bangarori.
Baerbock ta nuna cewa, a bisa halin da ake ciki yanzu inda tsarin kasa da kasa da kuma na damawa da mabambantan bangarori ke fuskantar matsin lamba, babban nauyin da ke kan shugaban babban taron MDD shi ne kiyaye kundin tsarin MDD da kuma ginshikan da aka kafa ta a kai guda uku: zaman lafiya da tsaro, ci gaba mai dorewa, da kare hakkin dan’adam. Ta yi kira da a kafa kawance tsakanin yankuna daban-daban domin su hada karfi da karfe wajen kare tsarin damawa da mabambantan bangarori.
Baerbock ta kara da cewa, daga bangaren sha’anin kudi kuma, a halin yanzu Sin tana daya daga cikin manyan masu ba da gudummawa ga MDD. Kasar Sin tana tallafa wa ayyukan wanzar da zaman lafiya kana tana shiga sosai a dama da ita a sashen samar da ci gaba mai dorewa.
Haka nan, kasar ba wai kawai tana cika alkawuranta ba ne, har ma tana karfafa gwiwar sauran kasashe su yi aiki tare da juna. (Abdulrazaq Yahuza Jere)
