Jam’iyyar APC ta ƙara wa’adin sayar da fom ɗin nuna sha’awar yin takara, tare da ranar miƙa su, domin shirye-shiryen zaɓen 2027.
Kwamitin gudanarwa na ƙasa (NWC) na jam’iyyar ne ya yanke wannan shawara a taronsa da aka gudanar a sakatariyar jam’iyyar da ke Abuja. Kakakin jam’iyyar na ƙasa, Durosinmi Meseko, ya ce an ɗauki matakin ne sakamakon hutun gwamnati na ranar Juma’a da kuma yawan masu sha’awar tsayawa takara.
A cewarsa, sayar da fom wanda da farko zai ƙare ranar Asabar, 2 ga watan Mayu, yanzu an tsawaita shi zuwa tsakar dare na ranar Litinin, 4 ga watan Mayu, 2026.
Haka kuma, ranar miƙa fom ɗin da aka cika, wacce aka tsara da farko zuwa ranar Litinin, yanzu an mayar da ita zuwa Talata, 5 ga watan Mayu, 2026, yayin da za a gudanar da tantance ’yan takara a ranar Laraba, 6 ga watan Mayu.
Meseko ya bayyana cewa wannan sauyi zai bai wa dukkan masu sha’awar tsayawa takara damar samun lokaci mai kyau don kammala dukkan matakan da ake buƙata.
