A baya bayan nan wasu rahotanni daga Amurka na cewa gwamnatin kasar na zargin wasu kamfanonin Sin da satar fasahar AI, tare da gabatar da dabarun sarrafa fasahar a matsayin shaidar hakan, a wani yanayi da Amurka ta saba amfani da shi don shafawa kamfanonin Sin abokan takarar kamfanoninta bakin fenti.
Alal hakika ma dabarun cin gajiyar fasahar kirkirarriyar basira ta AI da ake amfani da su a yanzu haka a duniya, sun kunshi musayar basirar tsakanin manyan na’urori zuwa wasu kanana daban daban, kuma hakan budadden tsari ne da aka saba aiki da shi a salon cin gajiyar aikin sarrafa na’urori masu kwakwalwa tun fil azal.
Wani yanayi da aka saba gani, har ma aka fara sabawa da shi game da gwamnatin Amurka, shi ne yadda a duk lokacin da kasar Sin ta samu wani ci gaba a fannin fasaha, nan da nan sai Amurka ta bullo da wasu zarge-zarge na cewa wai an saci fasahohinta.Ga misali, a lokacin da kamfanin fasahohi na Huawei na kasar Sin ya cimma nasarar kafa tsarin aikin intanet mai saurin gaske na 5G, nan da nan sai Amurka ta bayyana hakan a matsayin barazana ga tsaronta.
Kana yayain da dandalin sada zumunta na TikTok na kamfanin kasar Sin ya samu miliyoyin Amurkawa masu amfani da shi, a nan ma sai Amurka ta ce ana amfani da dandalin wajen yi mata kutse da tattara bayanai. Har ila yau, yayin da kamfanin DeepSeek ya fitar da tsarin aikin fasahar AI mafi karfi da rahusa a shekarar bara, nan ma Amurka ta zargi kamfanin Sin da ya samar da shi da laifin satar fasaha.
Don haka, akasarin masharhanta ke ganin irin wadannan zarge-zarge ba su da tushe ko makama, ana ma iya cewa a duk lokacin da fannonin da Amurka ke da fifiko suka fuskanci takara, nan take sai kasar ta fara furta wasu batutuwa na suka da bata sunan abokan gogayyarta.
Gudanar da ayyukan fasaha a bude, da hadin gwiwar cin gajiyarsu sun jima da zama wasu muhimman ginshikai na bunkasa fasahohin zamani.
Don haka, lokaci ya yi da Amurka za ta yi watsi da manufar nan ta “kashin dankali”, wadda ke nufin ita kadai ke son cin gajiyar duk wata fa’ida, in ba haka ba za ta kai ga zama saniyar ware a turbar samun ci gaban duniya mai dorewa. (Saminu Alhassan)
