Wakilin Sin na dindindin a MDD Fu Cong, ya yi jawabi jiya 22 a babban taron MDD kan batun gyare-gyaren kwamitin sulhu, inda ya jaddada cewa makasudin gyare-gyaren da ake sa ran yi wa kwamitin sulhu shi ne, canja halin da kwamitin ke ciki na ba da karfin wakilcin kasashe masu wadata a kwamitin fiye da kima.  Fu Cong ya ce, Sin na goyon bayan kwamitin sulhu ya yi gyare-gyare da suka wajaba kuma masu ma'ana domin kara karfin iko da ingancinsa, da kara karfin fuskantar rikice-rikice da kalubale, da gudanar da aikin da kundin tsarin MDD ya dora masa.  Fu Cong ya gabatar da shawarwari guda 3, wadanda suka kunshi, na farko, dole ne a mai da hankali kan kara karfin kasashe masu tasowa a kwamitin a fannin wakilci da damar yin magana. A ba da dama ga kasashe masu tasowa da ke da 'yancin kai a manufofin harkokin waje, da kananan da matsakaitan kasashe, wajen shiga aikin yanke shawara a kwamitin, musamman a gyara kuskuren da aka yi wa Afirka a tarihi, da kuma amsa bukatun Afirka bisa manufar karamci.  Na biyu, dole ne a mutunta yarjejeniyar kasashe mambobin kungiyar, da kuma dagewa kan warware batutuwa daga tushe. Idan a samar da "shirin gyare-gyare iri daya" cikin gaggawa kafin bangarorin da abin ya shafa su cimma cikakkiyar matsaya daya, hakan zai kara tsananta sabanin ra'ayi da rikice-rikice tsakanin bangarorin.  Na uku, a tabbatar da cewa tattaunawar da ake yi tsakanin gwamnatoci ita ce kadai halastacciyar turbar da mambobin kasashen majalisar ke bi wajen tattauna batun gyare-gyaren kwamitin, kuma ya zama ba za a iya maye gurbin rawar da take takawa ba.(Amina Xu) 

 A yau, an bude dandalin tattaunawa kan inganta tsarin jagorancin duniya na shekarar 2026, a sabon yanki na Xiong'an na kasar Sin. Taken dandalin kuma shi ne "Sake samar da kwarin gwiwa da damar hadin gwiwa: Manyan sauye-sauyen da ake fuskanta da kuma batun inganta tsarin jagorancin duniya."   Kafin haka, a watan Satumban bara, shugaban kasar Sin Xi Jinping ya gabatar da babbar shawarar inganta tsarin jagorancin duniya a taron kungiyar hadin gwiwa ta Shanghai (SCO). Daga baya, a watan Mayu na bana, kasar Sin ta kira taron "Kungiyar abokai da suka amince da shawarar inganta tsarin jagorancin duniya" a hedkwatar Majalisar Dinkin Duniya da ke birnin New York na kasar Amurka, kafin daga bisani a watan Yunin da ya gabata, kasar ta fitar da takardar bayani don bayyana ra'ayinta a fannin inganta tsarin jagorancin duniya.  Shin ko me ya sa kasar Sin ke mai da cikakken hankali kan batun inganta tsarin jagorancin duniya? Dalili shi ne tsarin jagorancin duniya yana cikin wani yanayi na matukar bukatar samun gyara. A duniyarmu, yadda dimbin kasashe masu tasowa ke samun ci gaba cikin sauri ya riga ya sauya fasalin tattalin arzikin duniya, amma har yanzu tsarin raba wakilci da ikon fada-a-ji ta fuskar jagorancin duniya bai canza sosai ba. A bisa wannan yanayi ne, gibin jagoranci yake bayyana a sabbin fannoni, kamarsu tinkarar sauyin yanayin duniya, da fasahar kirkirarriyar basira ta AI, da harkoki masu alaka da yanar gizo ta Intanet, da tsaron sararin samaniya, yayin da manufar damawa da bangarori daban-daban ke fama da mawuyacin hali, sakamakon yadda wasu kasashe ke yawan daukar matakan kashin kai da nuna salon daukar matsaya biyu.  To, ko ta yaya za a iya inganta jagorancin duniya? Dangane da wannan tambaya, amsar da kasar Sin ta gabatar ita ce babbar shawarar inganta tsarin jagorancin duniya, wadda manyan ka'idojinta su ne "Tabbatar da daidaiton mabambantan kasashe a fannin ikon mulkin kansu, da bin dokokin kasa da kasa, da aiwatar da manufar cudanyar sassa daban daban, da dora muhimmancin mutane a gaba da komai, da kuma kokarin daukar takamaiman matakai." Wannan shawara tana da nufin sanya tsarin jagorancin duniya ya kara zama mai adalci da gaskiya, tare da tabbatar da cewa mabambantan kasashe za su dauki nauyin tsarawa da kare ka'idojin duniya a hadin gwiwarsu. Tun lokacin da aka gabatar da shawarar, ta samu goyon baya daga kasashe da kungiyoyin kasa da kasa su kusan 160. Wannan ya nuna cewa, shawarar nan da kasar Sin ta gabatar za ta iya biyan bukatar galibin kasashe, musamman ma wadanda ke kan hanyar tasowa.  A kan batun jagorancin duniya, kasar Sin da kasashen Afirka suna da matsaya iri daya. Saboda Sin da Afirka dukkansu sun yi kira da a yi wa Majalisar Dinkin Duniya da kwamitin sulhu dake karkashin majalisar garambawul, don daidaita yanayin rashin adalci da kasashen Afirka ke fuskanta sakamakon wasu batutuwan tarihi, da kuma kara wakilcin kasashe masu tasowa, musamman ma kasashen Afirka, a Majalisar Dinkin Duniya da kwamitin sulhunta. Kana a fannin huldar kasa da kasa, Sin da Afirka sun nuna cikakken goyon baya ga ka'idojin dangantakar kasa da kasa, wadanda aka tsara bisa tushen kundin Majalisar Dinkin Duniya, kuma suna adawa da mulkin danniya, da yunkurin raba kasashe zuwa rukunoni daban daban bisa ra'ayin mulki, gami da ta da rikici tsakanin rukunonin. A fannin tattalin arziki, Sin da Afirka suna goyon bayan dunkulewar duniya a fannin tattalin arziki a kokarin amfanin kowa, tare da bukatar yin gyare-gyare a hukumomin hada-hadar kudi na duniya, kamar su Bankin Duniya, da Asusun ba da lamuni na duniya, don habaka wakilcin kasashe masu tasowa a cikin wadannan hukumomi, da ba su ikon bayyana ra'ayoyinsu.  Dandalin tattaunawa kan inganta tsarin jagorancin duniya da aka kira a wannan karo ya kunshi kananan tarukan tattaunawa guda biyar, wadanda ke mai da hankali kan wasu batutuwa masu nasaba da jagorancin duniya da suka fi janyo hankalin mutanen duniya, wato su: "Aiwatar da manufar cudanyar sassa daban daban, da kare tsarin duniya mai daukaka matsayin Majalisar Dinkin Duniya", da "Yayata ra'ayin yin hadin gwiwa gami da amfanar da juna, da neman cimma ra'ayi daya don kara saurin ci gaban tattalin arziki", da "Tabbatar da daidaito da fa'idar juna, da zurfafa gyare-gyaren tsarin tattalin arziki da na hada-hadar kudi", da "Inganta jagoranci a wasu sabbin fannoni, kamarsu fasahar AI, da yanar gizo ko Intanet, da kuma sararin samaniya," da kuma "Inganta musayar al'adu, don samar da damar yarda da juna da koyi da juna". Babu shakka, kasar Sin da kasashen Afirka za su iya amfani da damar da wannan dandalin ya bayar don mai da burin da aka sanya ya zama tsarin hadin gwiwa, da daukar matakai bisa matsaya daya da aka cimma, tare da kokarin ba da gudummawa ga yunkurin gina tsarin jagorancin duniya mai adalci da gaskiya. (Bello Wang) 

Jakadan kasar Sin kan kwance damarar makamai Li Chijiang, ya gabatar da jawabi kan batutuwan da suka shafi tsaron sararin samaniya a zaman kwamitin farko na zauren MDD na 21, inda ya jaddada cewa, kare gasar makamai da jibge su a sararin samaniya, shi ne batu na gaggawa da ya kamata a mayar da hankali a kai, a tsarin jagorantar tsaron sararin samaniya.  Li Chijiang ya ce yadda ake gasar makamai da jibge su a sararin samaniya, ta zama wata babbar barazana a yanzu. Ya ce Amurka na daukar sararin samaniya a matsayin fagen daga, kuma a bayyane take tura makamai cikin da’irar samaniya, lamarin dake aike mummunan sako ga kasa da kasa. Ya ce yadda galibin kasashe ke fafutukar kare tsaron sararin samaniya da burin wata kasa daya tilo na mamaye sararin sama, abu ne da ba a taba gani ba, lamarin dake haifar da gagarumin kalubale ga tsaron samaniya.   Jakadan na Sin ya gabatar da wasu shawarwari 4 dangane da batun. Shawara ta farko ita ce: ya kamata kare gasar makamai da jibge su a sararin samaniya ya zama batu mafi muhimmanci a tsarin shugabancin tsaron samaniyar. Ta biyu, a yi maraba da kokarin kasa da kasa na karfafa tattaunawa da cimma matsaya kan yarjejeniyoyin takaita makamai a samaniya. Shawara ta uku ita ce, nacewa tuntubar juna tsakanin bangarori daban-daban da adawa da fuska biyu. Ta hudu kuma, jaddada mayar da hankali kan batutuwa masu tasowa. Misali, gudanar da bincike mai zurfi kan dokokin da suka shafi takkadama da kalubalen dake tasowa daga harkokin kasuwanci masu alaka da rikicin makamai tsakanin kasa da kasa a sararin samaniya da lalubo ingantattun mafita masu karbuwa bisa cikakkiyar tuntubar juna. (Fa’iza Mustapha) 

An kaddamar da karamin dandalin tattauna batutuwan hada-hadar kudi na shekarar nan ta 2026 a kasar Kenya.  Karamin dandalin na bana da aka bude a jiya Laraba a birnin Nairobin kasar Kenya, bisa taken "Gudanar da komai a bude da cimma moriyar bai daya: Gina sabon karsashi domin nasarar hadin gwiwar ‘Ziri daya da hanya daya’ mai matukar inganci", shi ne karon farko da yake gudana a nahiyar Afirka. Ya kuma gudana tare da babban dandalin na birnin Beijing.  An hada tsakanin babban dandalin na birnin Beijing da na birnin Nairobi ta kafar bidiyo, inda mahalarta suka yi musayar ra’ayoyi dangane da batutuwa da dama, ciki har da zuba jari a shawarar “Ziri daya da hanya daya”, da hadin gwiwar samar da kudade, da hadin gwiwar hada-hadar kudade tsakanin kasa da kasa.  Da yake tsokaci yayin zaman, memban majalisar ministocin kasar Kenya mai lura da harkokin kudi da tsara tattalin arziki John Mbadi Ng'ongo, ya ce shawarar “Ziri daya da hanya daya”, ta taimaka wa kasashen da suka shiga cikinta, da damar kyautata dinkewa waje guda, da ingiza harkokin cinikayya da zuba jari, da fadada kafofin bunkasa hada-hadar kudi.   Kazalika, a cewar sa hadin gwiwar Sin da kasashen Afirka, ta samar da zarafin tattara albarkatu domin manya ayyukan samar da ci gaba masu muhimmanci, da ingiza raba ilimi da musayar fasaha, da zurfafa bunkasar dunkulewar tattalin arzikin yankin. (Saminu Alhassan) 

Yau ita ce ranar tunawa da cikar shekaru 90 da samun nasarar Doguwar Tafiya ta Jar Rundunar Soja ta Ma’aikata da Manoma ta Sin. Daga watan Oktoban shekarar 1934 zuwa Oktoban 1936, Jam'iyyar Kwaminis ta kasar Sin ta jagoranci rundunar (wadda ita ce asalin Rundunar Sojojin 'Yantar da Jama'ar Sin) a rassa hudu, inda suka gudanar da wani babban matakin soja da aka fi sani da "Doguwar Tafiya" daga baya. Rundunar ta yi doguwar tafiya mai nisan kilomita sama da dubu goma sha biyu, ta haye wahalhalu masu tarin yawa, tare da dakile sojoji magabata da ke binta da kuma yi mata kwanton bauna, matakin da ya murkushe yunkurin tsohuwar gwamnati ta wancan lokaci da ke karkashin jam’iyyar Kuomintang na kawar da Jam'iyyar Kwaminis ta Sin da kuma Jar Rundunar Soja, tare da bude sabon babin juyin juya halin Sin cikin nasara.  Yau tuni Sojojin 'Yantar da Jama'ar Sin ta bunkasa, kuma kasar Sin ma ta fita daga yanayi na koma baya, sai dai “Doguwar Tafiya” ba ta zama tsohon yayi ba. Jam'iyyar Kwaminis ta Sin ta bayyana kokarin da take yi na farfado da al'ummar kasar Sin da zamanantar da kasar a matsayin "Doguwar Tafiya a zamaninmu na yanzu." Wannan ba magana ce kawai ba, duba da cewa an fitar da kusan mutane miliyan 100 da ke yankunan karkara na kasar daga kangin talauci, kuma an gina layin dogo na jiragen kasa masu saurin gudu fiye da kilomita dubu 50 a kasar, sai kuma nasarorin a zo a gani da kasar ta cimma ta fannin bunkasa ayyukan binciken sararin samaniya, inda na’urar bincike ta "Chang'e" ta dawo da kasa daga duniyar wata, kuma na’urar "Tianwen" ta sauka a duniyar Mars,  kuma kasar tana ta tura ‘yan sama jannati zuwa tasharta ta sararin samaniya. Nasarorin ba su samu ta ba zata ba, a maimakon hakan, niyyar samun karin ci gaba ta al’ummar kasar Sin daga zuriya zuwa zuriya ce ta kai ga cimma su. Ba wahalhalu iri daya da yadda Jar Rundunar Soja suka fuskanta a zamaninsu ba, amma mutanen kasar Sin na wannan zamani suna da nasu nauyin da aka dora musu.   Kasashen Afirka ma suna da tasu "Doguwar Tafiya." Ana bayyana shekarar 1960 "Shekarar Afirka", kasancewar kasashen Afirka 17 suka sami 'yancin kai a waccan shekara. Daga nan, cikin gomman shekaru, kasashen Afirka suna ta fafatawa wajen cimma burikansu na hada kan al’ummar Afirka da Ajandar 2063 ta kungiyar kasashen Afirka, da kafa yankin cinikayya cikin 'yanci na Afirka da ci gaban masana'antu da dunkulewar nahiyar Afirka baki daya, lallai kowanensu ba su da sauki. Sin ita kanta ta san wahalar wannan hanya, sabo da ita ma ta taba fuskantar wahalhalu makamanta, kuma a lokaci mafi wahala, al’ummar kasar sun bi ruhin "Doguwar Tafiya", sun yi ta yin kokari ba tare da tsayawa ba har sun kai ga cimma burinsu daga karshe.  Sakamakon haka, a karshen shekarun 1960, lokacin da Tanzania da Zambia suka fi bukatar hanyar fita zuwa teku, Sin ta aika da masu aikin bincike da injiniyoyi don su ba da taimako. Fiye da mutane dubu 50 na kasar Sin sun shiga aikin gine-gine, kuma fiye da injiniyoyi 60 na kasar sun sadaukar da rayukansu a wannan babban aiki. Daga baya, an kira layin dogo na Tanzania-Zambia "Hanyar 'Yanci," sabo da ba wai kawai ta taimaka ga fitar da tagulla ta Zambia zuwa ketare ba, har ma ta sa kasar ta tsaya kan kafafuwanta. A yau wannan "Hanyar 'Yanci" tana ci gaba da wanzuwa, in mun duba, layin dogo na Abuja-Kaduna na Najeriya ya rage lokacin tafiya daga Abuja zuwa Kaduna daga awa 3 zuwa kusan awa 1, wanda hakan ya inganta zamanantar da layukan dogo a kasar, tare da samar da guraben aiki da ci gaban tattalin arziki, har ila yau, tashar jiragen ruwa mai zurfi ta Lekki tana inganta karfin jigilar kaya ta teku na Najeriya, da inganta cinikin shige da fice na kasar, baya ga taimakawa ci gaban tattalin arzikin kasashen da ke kewaye. Idan ba a manta ba kuma, a cikin sama da shekaru 60 da suka wuce, kasar Sin ta yi ta tura likitocinta zuwa kasashen Afirka, sai kuma kwararrun noma da suka kai fasahohin inganta irin shinkafa, da noman laimar kwado, da kuma cibiyoyin Luban da ke samar da horaswa ga matasa.  Lallai Doguwar Tafiya a sabon zamani tana karkashin kafafuwan kowace kasa da kowace al'umma da ke kan hanyarsu ta neman ci gaba. Ga Sin, wannan hanya tana kaiwa ga samar da wadata ga kowa, dogaro da kai ta fannin raya fasahohin zamani, da samar da ci gaban kasar ba tare da gurbata muhalli ba, kuma ga Afirka, wannan hanya tana kaiwa ga bunkasar masana'antu, da dunkulewar nahiyar baki daya da kuma mutunci na gaskiya. Duk da cewa hanyoyin sun bambanta, amma idan muka daga kai a kan hanyoyinmu, za mu ga niyyar cimma su a fuskar juna. Da hanyoyin biyu suka hadu a wasu lokuta, wanda ya fi sauri kuma ya san ya mika hannu ya ja abokin tafiyarsa.(Lubabatu Lei) 

Bankin shige da fice na Sin ya sanar da nasarorin da ya samu a hadin gwiwar gina ayyuka masu alaka da shawarar “Ziri Daya da Hanya Daya” da kuma muhimman bangarorin hadin gwiwa a nan gaba.  Bankin ya bayyana haka ne jiya Laraba, yayin taro kan shawarar “Ziri Daya da Hanya Daya” da aka yi a gefen taron shekara-shekara kan harkokin kudi na Sin.  Rahotanni sun bayyana cewa, cikin shekaru 10 da suka gabata, bankin na Sin ya bayar da rancen sama da yuan triliyan 7 ga ayyukan shawarar, wadanda suka shafi kasashe 130.  Yanzu haka, hadin gwiwar gina “Ziri Daya da Hanya Daya” ya shiga wani sabon mataki na ci gaba mai inganci. Shugaban bankin Chen Huaiyu ya ce, bankin zai ci gaba da inganta karfinsa na hadin gwiwar da aka saba kan ababen more rayuwa kamar layukan dogo da tashoshin jiragen ruwa da makamashi, yayin da yake mayar da hankali kan fannoni kamar na makamashi mai tsafta da tattalin arziki na dijital, domin taimaka wa kasashe abokan huldar shawarar, kafa nasu tsarin masana’antu.  Ya kara da cewa, bankin zai ci gaba da hada hannu da Sin wajen bunkasa manyan ayyuka da ma shirin kyautata rayuwar jama’a mai lakabin “karami, mai kyau,” da gaggauta aiwatar da shirye-shiryen kare muhalli da hanyar siliki mai fasahar zamani da tallafa wa tsarin gargadin yanayi na MAZU a Afrika, domin bunkasa karfin karewa da magance ibtila’in yanayi. (Fa’iza Mustapha) 

 A bana aka cika shekaru 70 da Sin da Afirka suka kulla huldar diflomasiyya, kuma ita ce shekarar musayar al’adu tsakanin Sin da Afirka. Kwanan nan, sashen Asiya da Afirka na babban rukunin gidajen rediyo da talabijin na kasar Sin CMG tare da hadin gwiwar tashar yada labarai ta   Lardin Hunan na CMG sun gabatar da bikin “Yawo a Sin-ziyarar Hunan”, inda suka gayyaci ‘yan jarida na manyan kafofin yada labarai daga Nijar, Ghana da sauransu, da masanan malamai da shahararrun masu yada labarai a yanar gizo su shiga biranen Changsha, da Shaoyang da Xiangxi, domin kara wa juna sani da ingiza musayar dabarun ci gaba.  Hunan babban lardi ne na noma. Tawagar ta ziyarci cibiyar binciken shinkafar da aka tagwaita ta Hunan, don fahimtar sakamakon aikin taimaka wa nahiyar Afirka bisa ayyukan shinkafar, tare da mai da hankali kan shirin hadin gwiwa na tabbatar da isasshen abinci ga kasashe masu tasowa. Sun kuma shiga manyan kamfanonin fasahohin zamani da dama, inda suka fahimci yadda kayayyakin injuna ke taimaka wa aikin gina ababen more rayuwa a Afirka, da kuma ganin yadda fasahar kirkire-kirkire ta zamani ke taka rawa wajen gyara tsarin masana’antu da kyautata rayuwar jama’a.  Samira lbrahim Sabou, wata shahararriyar mai yada labarai a shafin sada zumunta na Nijar, ta ce ta ga yadda Sin ke kokarin kirkirar mutum-mutumin inji iri daban-daban da bunkasa fasahohin zamani don bauta wa jama’a, da kyautata zaman rayuwarsu.(Amina Xu) 

Shekaru sama da 80 sun shude tun bayan kammala yakin duniya na biyu, kuma duniya na aza tambaya ga kasar Japan, cewa ko ta koyi sahihin darasi daga mummunan tasirin da nuna karfin soji ya haifar mata? Kuma ko ta yi karatun ta nutsu, ta rungumu zaman lafiya? Ko kuwa kamar yadda ake zargi cewa ta sake komawa mummunar manufar farfado da karfin soji? Matakin da zai gurgunta alkawarin da ta dauka na kauracewa hakan.  Wadannan tambayoyi sun zama wajibi musamman a wannan lokaci, ganin yadda a baya bayan nan firaministar Japan Sanae Takaichi ta aike da hadaya, kana jerin jami’an gwamnatin kasarta, da manyan jami’an jam’iyyar LDP, da ’yan majalisun dokokin kasar suka ziyarci haikalin Yasukuni, duk da kasancewarsa wuri da aka binne ajin farko na muggan jami’an Japan dake da alhakin aikata laifukan yaki a lokacin yakin mamaya da ya shude.  Alal hakika, wadannan matakai ba wai suna nufin bayyana makoki kadai ba ne, maimakon haka suna kunshe da wani sako na siyasa, dake iya haifar da tambaya game da irin mahangar shugabannin Japan, dangane da laifukan yaki da kasar ta aikata kan makwaftanta a baya.  A bana ake cika shekaru 80 da bude shari’o’in birnin Tokyo, wadanda suka samu jagorori mayakan Japan da aikata muggan laifukan yaki. Kuma 14 daga jiga-jigansu an binne su ne a haikalin na Yasukuni. Don haka, ga kasashe da yankuna da suka dandana mummunan tasirin danniyar Japan, ganin jami’an kasar na ziyartar haikalin zai sanya su yin tambaya game da ko Japan ta yi tuba na hakika? Kuma ta fahimci nauyin tarihi dake rataye a wuyanta na rungumar matakan zaman lafiya ko a’a.  Bayanan baya bayan nan sun nuna yadda Japan ke kara yawan kasafinta a fannin soji, ta kuma fadada matakai masu sabawa tarnakin da aka kakaba mata bayan yakin duniya na biyu. Kazalika, a watan Afirilun bana ma, gwamnatin kasar ta yi sauye-sauye dangane da ka’idoji uku masu nasaba da samar da kayayyakin tsaro, da fasahohi masu nasaba, da ma dage dakatarwar dake kan kasar na fitar da makamai masu hadari.  Ko shakka babu yayin da Japan ke gaggauta gina matakai masu nasaba da farfado da karfin soji, da nuna rashin damuwa da matakan siyasa masu illata alkawuran da ta dauka, dole ne idon duniya ya karkata gare ta. Baki dayan yankin da Japan take, ba kawai yana bukatar ta dakatar da farfado da karfin soji ba ne, har ma yana bukatar ta aiwatar da matakai da za su karfafa gwiwar kowa, tare da wanzar da tattaunawa, da tuntuba da kuma martaba dokokin kasa da kasa.  Su kansu al’ummun kasar Japan, wadanda jagororin kasar ke tura su cikin wannan kiki-kaka a siyasance, na da nauyin tabbatar da cewa ba su bari kasarsu ta sake komawa kan turbar ayyukan danniya, ta amfani da karfin soji ba. Tabbas, darussan tarihi ba tarnaki ne ga makomar kasar Japan ba, maimakon hakan, suna haskawa kasar wata turba ce ta kaucewa sake fadawa mummunan kuskuren da ta fada a baya. (Saminu Alhassan)  )

Xi Jinping Ya Halarci Taron Tunawa Da Cika Shekaru 90 Da Nasarar Doguwar Tafiya Tare Da Gabatar Da Jawabi  Da safiyar yau, an gudanar da babban taron tunawa da cika shekaru 90 da nasarar doguwar tafiyar rundunar jajayen sojoji na ma’aikata da manoma karkashin jagorancin jam’iyyar kwaminis ta Sin JKS a Beijing. Xi Jinping, babban sakataren kwamitin kolin JKS kana shugaban kasar, kuma shugaban kwamitin koli na soja, ya gabatar da jawabi.  A cikin jawabinsa Xi ya bayyana cewa, daga watan Oktoba na shekarar 1934 zuwa watan Oktoba na shekarar 1936, rundunar ta yi wata doguwar tafiya da ta girgiza duniya kuma ta shiga tarihi karkashin jagorancin JKS. Doguwar tafiyar rundunar sojin ta ratsa larduna sama da 10, ta kai km 12500, wadda ta dakile matakan da miliyoyin sojojin makiya suka yi na samame, matakin da ya sanar da gazawar makircin ‘yan adawar jam’iyyar Kuomingtang na dakile JKS da rundunarta.  Ya jaddada cewa, ruhin doguwar tafiyar ya nuna karfin aminci da gaskiya, da karfin adalci da hadin kai, kuma a matsayinsa na muhimmin bangare na jerin ruhohin ‘yan JKS, dukiya ce mai daraja da ingantaccen karfi na karawa matasa kwarin gwiwa don su shawo kan kalubale da tafiya zuwa gaba.  Xi ya kuma kara da cewa, tunawa da tarihi shi ne ginshigin kafa makoma, kuma ya kamata dukkan ‘yan jam’iyyar JKS da sojoji da dukkan al’ummar kasar su yayata ruhin babbar doguwar tafiyar, da ingiza babban aikin da magabata suka dukufa kan shi zuwa gaba. (Amina Xu) 

Ma’aikatar kasuwanci ta Sin ta ce, ci gaban da kamfanonin fasahar AI na kasar suka samu cikin sauri, ya samo asali ne daga lokaci mai tsawo da aka dauka ana zurfafa bincike mai tushe da kara karfin kirkire-kirkire, kuma ba shi da alaka da abin da ake kira wai “satar sirrin kasuwanci”.   Kakakin ma’aikatar ne ya bayyana haka jiya Talata, yayin da yake amsa tambayoyin manema labarai kan takunkumin da Amurka ta kakaba wa kamfanonin Sin bisa zargin satar sirrin kasuwanci.   A cewar kakakin, Amurka na bata sunan kamfanonin Sin da kuma kakaba musu takunkumi, lamarin dake matukar lalata muhimmiyar moriyar kamfanonin, kuma Sin na adawa da hakan.  Bugu da kari, game da sanarwar da ma’aikatar tsaron cikin gida ta Amurka ta fitar kan umarnin kayyadewa da hana shigar da kayayyakin kamfanonin Sin, kakakin ya ce, Sin na bukatar Amurka da ta mutunta tsari da ka’idojin kasuwa, kuma ta gyara kuskuren da take yi nan take, kana ta daina matsin lamba maras dalili kan kamfanonin Sin. Ban da wannan kuma, ta soke matakan nuna wariya, domin a shimfida kyakkyawan yanayi da kamfanonin kasashen biyu za su ci gaba da mu’amala da hadin gwiwa yadda ya kamata.   Ya ce, Sin za ta ci gaba da lura da al’amarin, kuma za ta dauki duk matakan da suka dace kan duk wani abu dake lalata muradunta, don kare moriyar kamfanonin kasar. (Amina Xu)