Yau ita ce ranar tunawa da cikar shekaru 90 da samun nasarar Doguwar Tafiya ta Jar Rundunar Soja ta Ma’aikata da Manoma ta Sin. Daga watan Oktoban shekarar 1934 zuwa Oktoban 1936, Jam'iyyar Kwaminis ta kasar Sin ta jagoranci rundunar (wadda ita ce asalin Rundunar Sojojin 'Yantar da Jama'ar Sin) a rassa hudu, inda suka gudanar da wani babban matakin soja da aka fi sani da "Doguwar Tafiya" daga baya. Rundunar ta yi doguwar tafiya mai nisan kilomita sama da dubu goma sha biyu, ta haye wahalhalu masu tarin yawa, tare da dakile sojoji magabata da ke binta da kuma yi mata kwanton bauna, matakin da ya murkushe yunkurin tsohuwar gwamnati ta wancan lokaci da ke karkashin jam’iyyar Kuomintang na kawar da Jam'iyyar Kwaminis ta Sin da kuma Jar Rundunar Soja, tare da bude sabon babin juyin juya halin Sin cikin nasara.  Yau tuni Sojojin 'Yantar da Jama'ar Sin ta bunkasa, kuma kasar Sin ma ta fita daga yanayi na koma baya, sai dai “Doguwar Tafiya” ba ta zama tsohon yayi ba. Jam'iyyar Kwaminis ta Sin ta bayyana kokarin da take yi na farfado da al'ummar kasar Sin da zamanantar da kasar a matsayin "Doguwar Tafiya a zamaninmu na yanzu." Wannan ba magana ce kawai ba, duba da cewa an fitar da kusan mutane miliyan 100 da ke yankunan karkara na kasar daga kangin talauci, kuma an gina layin dogo na jiragen kasa masu saurin gudu fiye da kilomita dubu 50 a kasar, sai kuma nasarorin a zo a gani da kasar ta cimma ta fannin bunkasa ayyukan binciken sararin samaniya, inda na’urar bincike ta "Chang'e" ta dawo da kasa daga duniyar wata, kuma na’urar "Tianwen" ta sauka a duniyar Mars,  kuma kasar tana ta tura ‘yan sama jannati zuwa tasharta ta sararin samaniya. Nasarorin ba su samu ta ba zata ba, a maimakon hakan, niyyar samun karin ci gaba ta al’ummar kasar Sin daga zuriya zuwa zuriya ce ta kai ga cimma su. Ba wahalhalu iri daya da yadda Jar Rundunar Soja suka fuskanta a zamaninsu ba, amma mutanen kasar Sin na wannan zamani suna da nasu nauyin da aka dora musu.   Kasashen Afirka ma suna da tasu "Doguwar Tafiya." Ana bayyana shekarar 1960 "Shekarar Afirka", kasancewar kasashen Afirka 17 suka sami 'yancin kai a waccan shekara. Daga nan, cikin gomman shekaru, kasashen Afirka suna ta fafatawa wajen cimma burikansu na hada kan al’ummar Afirka da Ajandar 2063 ta kungiyar kasashen Afirka, da kafa yankin cinikayya cikin 'yanci na Afirka da ci gaban masana'antu da dunkulewar nahiyar Afirka baki daya, lallai kowanensu ba su da sauki. Sin ita kanta ta san wahalar wannan hanya, sabo da ita ma ta taba fuskantar wahalhalu makamanta, kuma a lokaci mafi wahala, al’ummar kasar sun bi ruhin "Doguwar Tafiya", sun yi ta yin kokari ba tare da tsayawa ba har sun kai ga cimma burinsu daga karshe.  Sakamakon haka, a karshen shekarun 1960, lokacin da Tanzania da Zambia suka fi bukatar hanyar fita zuwa teku, Sin ta aika da masu aikin bincike da injiniyoyi don su ba da taimako. Fiye da mutane dubu 50 na kasar Sin sun shiga aikin gine-gine, kuma fiye da injiniyoyi 60 na kasar sun sadaukar da rayukansu a wannan babban aiki. Daga baya, an kira layin dogo na Tanzania-Zambia "Hanyar 'Yanci," sabo da ba wai kawai ta taimaka ga fitar da tagulla ta Zambia zuwa ketare ba, har ma ta sa kasar ta tsaya kan kafafuwanta. A yau wannan "Hanyar 'Yanci" tana ci gaba da wanzuwa, in mun duba, layin dogo na Abuja-Kaduna na Najeriya ya rage lokacin tafiya daga Abuja zuwa Kaduna daga awa 3 zuwa kusan awa 1, wanda hakan ya inganta zamanantar da layukan dogo a kasar, tare da samar da guraben aiki da ci gaban tattalin arziki, har ila yau, tashar jiragen ruwa mai zurfi ta Lekki tana inganta karfin jigilar kaya ta teku na Najeriya, da inganta cinikin shige da fice na kasar, baya ga taimakawa ci gaban tattalin arzikin kasashen da ke kewaye. Idan ba a manta ba kuma, a cikin sama da shekaru 60 da suka wuce, kasar Sin ta yi ta tura likitocinta zuwa kasashen Afirka, sai kuma kwararrun noma da suka kai fasahohin inganta irin shinkafa, da noman laimar kwado, da kuma cibiyoyin Luban da ke samar da horaswa ga matasa.  Lallai Doguwar Tafiya a sabon zamani tana karkashin kafafuwan kowace kasa da kowace al'umma da ke kan hanyarsu ta neman ci gaba. Ga Sin, wannan hanya tana kaiwa ga samar da wadata ga kowa, dogaro da kai ta fannin raya fasahohin zamani, da samar da ci gaban kasar ba tare da gurbata muhalli ba, kuma ga Afirka, wannan hanya tana kaiwa ga bunkasar masana'antu, da dunkulewar nahiyar baki daya da kuma mutunci na gaskiya. Duk da cewa hanyoyin sun bambanta, amma idan muka daga kai a kan hanyoyinmu, za mu ga niyyar cimma su a fuskar juna. Da hanyoyin biyu suka hadu a wasu lokuta, wanda ya fi sauri kuma ya san ya mika hannu ya ja abokin tafiyarsa.(Lubabatu Lei) 

Bankin shige da fice na Sin ya sanar da nasarorin da ya samu a hadin gwiwar gina ayyuka masu alaka da shawarar “Ziri Daya da Hanya Daya” da kuma muhimman bangarorin hadin gwiwa a nan gaba.  Bankin ya bayyana haka ne jiya Laraba, yayin taro kan shawarar “Ziri Daya da Hanya Daya” da aka yi a gefen taron shekara-shekara kan harkokin kudi na Sin.  Rahotanni sun bayyana cewa, cikin shekaru 10 da suka gabata, bankin na Sin ya bayar da rancen sama da yuan triliyan 7 ga ayyukan shawarar, wadanda suka shafi kasashe 130.  Yanzu haka, hadin gwiwar gina “Ziri Daya da Hanya Daya” ya shiga wani sabon mataki na ci gaba mai inganci. Shugaban bankin Chen Huaiyu ya ce, bankin zai ci gaba da inganta karfinsa na hadin gwiwar da aka saba kan ababen more rayuwa kamar layukan dogo da tashoshin jiragen ruwa da makamashi, yayin da yake mayar da hankali kan fannoni kamar na makamashi mai tsafta da tattalin arziki na dijital, domin taimaka wa kasashe abokan huldar shawarar, kafa nasu tsarin masana’antu.  Ya kara da cewa, bankin zai ci gaba da hada hannu da Sin wajen bunkasa manyan ayyuka da ma shirin kyautata rayuwar jama’a mai lakabin “karami, mai kyau,” da gaggauta aiwatar da shirye-shiryen kare muhalli da hanyar siliki mai fasahar zamani da tallafa wa tsarin gargadin yanayi na MAZU a Afrika, domin bunkasa karfin karewa da magance ibtila’in yanayi. (Fa’iza Mustapha) 

 A bana aka cika shekaru 70 da Sin da Afirka suka kulla huldar diflomasiyya, kuma ita ce shekarar musayar al’adu tsakanin Sin da Afirka. Kwanan nan, sashen Asiya da Afirka na babban rukunin gidajen rediyo da talabijin na kasar Sin CMG tare da hadin gwiwar tashar yada labarai ta   Lardin Hunan na CMG sun gabatar da bikin “Yawo a Sin-ziyarar Hunan”, inda suka gayyaci ‘yan jarida na manyan kafofin yada labarai daga Nijar, Ghana da sauransu, da masanan malamai da shahararrun masu yada labarai a yanar gizo su shiga biranen Changsha, da Shaoyang da Xiangxi, domin kara wa juna sani da ingiza musayar dabarun ci gaba.  Hunan babban lardi ne na noma. Tawagar ta ziyarci cibiyar binciken shinkafar da aka tagwaita ta Hunan, don fahimtar sakamakon aikin taimaka wa nahiyar Afirka bisa ayyukan shinkafar, tare da mai da hankali kan shirin hadin gwiwa na tabbatar da isasshen abinci ga kasashe masu tasowa. Sun kuma shiga manyan kamfanonin fasahohin zamani da dama, inda suka fahimci yadda kayayyakin injuna ke taimaka wa aikin gina ababen more rayuwa a Afirka, da kuma ganin yadda fasahar kirkire-kirkire ta zamani ke taka rawa wajen gyara tsarin masana’antu da kyautata rayuwar jama’a.  Samira lbrahim Sabou, wata shahararriyar mai yada labarai a shafin sada zumunta na Nijar, ta ce ta ga yadda Sin ke kokarin kirkirar mutum-mutumin inji iri daban-daban da bunkasa fasahohin zamani don bauta wa jama’a, da kyautata zaman rayuwarsu.(Amina Xu) 

Shekaru sama da 80 sun shude tun bayan kammala yakin duniya na biyu, kuma duniya na aza tambaya ga kasar Japan, cewa ko ta koyi sahihin darasi daga mummunan tasirin da nuna karfin soji ya haifar mata? Kuma ko ta yi karatun ta nutsu, ta rungumu zaman lafiya? Ko kuwa kamar yadda ake zargi cewa ta sake komawa mummunar manufar farfado da karfin soji? Matakin da zai gurgunta alkawarin da ta dauka na kauracewa hakan.  Wadannan tambayoyi sun zama wajibi musamman a wannan lokaci, ganin yadda a baya bayan nan firaministar Japan Sanae Takaichi ta aike da hadaya, kana jerin jami’an gwamnatin kasarta, da manyan jami’an jam’iyyar LDP, da ’yan majalisun dokokin kasar suka ziyarci haikalin Yasukuni, duk da kasancewarsa wuri da aka binne ajin farko na muggan jami’an Japan dake da alhakin aikata laifukan yaki a lokacin yakin mamaya da ya shude.  Alal hakika, wadannan matakai ba wai suna nufin bayyana makoki kadai ba ne, maimakon haka suna kunshe da wani sako na siyasa, dake iya haifar da tambaya game da irin mahangar shugabannin Japan, dangane da laifukan yaki da kasar ta aikata kan makwaftanta a baya.  A bana ake cika shekaru 80 da bude shari’o’in birnin Tokyo, wadanda suka samu jagorori mayakan Japan da aikata muggan laifukan yaki. Kuma 14 daga jiga-jigansu an binne su ne a haikalin na Yasukuni. Don haka, ga kasashe da yankuna da suka dandana mummunan tasirin danniyar Japan, ganin jami’an kasar na ziyartar haikalin zai sanya su yin tambaya game da ko Japan ta yi tuba na hakika? Kuma ta fahimci nauyin tarihi dake rataye a wuyanta na rungumar matakan zaman lafiya ko a’a.  Bayanan baya bayan nan sun nuna yadda Japan ke kara yawan kasafinta a fannin soji, ta kuma fadada matakai masu sabawa tarnakin da aka kakaba mata bayan yakin duniya na biyu. Kazalika, a watan Afirilun bana ma, gwamnatin kasar ta yi sauye-sauye dangane da ka’idoji uku masu nasaba da samar da kayayyakin tsaro, da fasahohi masu nasaba, da ma dage dakatarwar dake kan kasar na fitar da makamai masu hadari.  Ko shakka babu yayin da Japan ke gaggauta gina matakai masu nasaba da farfado da karfin soji, da nuna rashin damuwa da matakan siyasa masu illata alkawuran da ta dauka, dole ne idon duniya ya karkata gare ta. Baki dayan yankin da Japan take, ba kawai yana bukatar ta dakatar da farfado da karfin soji ba ne, har ma yana bukatar ta aiwatar da matakai da za su karfafa gwiwar kowa, tare da wanzar da tattaunawa, da tuntuba da kuma martaba dokokin kasa da kasa.  Su kansu al’ummun kasar Japan, wadanda jagororin kasar ke tura su cikin wannan kiki-kaka a siyasance, na da nauyin tabbatar da cewa ba su bari kasarsu ta sake komawa kan turbar ayyukan danniya, ta amfani da karfin soji ba. Tabbas, darussan tarihi ba tarnaki ne ga makomar kasar Japan ba, maimakon hakan, suna haskawa kasar wata turba ce ta kaucewa sake fadawa mummunan kuskuren da ta fada a baya. (Saminu Alhassan)  )

Xi Jinping Ya Halarci Taron Tunawa Da Cika Shekaru 90 Da Nasarar Doguwar Tafiya Tare Da Gabatar Da Jawabi  Da safiyar yau, an gudanar da babban taron tunawa da cika shekaru 90 da nasarar doguwar tafiyar rundunar jajayen sojoji na ma’aikata da manoma karkashin jagorancin jam’iyyar kwaminis ta Sin JKS a Beijing. Xi Jinping, babban sakataren kwamitin kolin JKS kana shugaban kasar, kuma shugaban kwamitin koli na soja, ya gabatar da jawabi.  A cikin jawabinsa Xi ya bayyana cewa, daga watan Oktoba na shekarar 1934 zuwa watan Oktoba na shekarar 1936, rundunar ta yi wata doguwar tafiya da ta girgiza duniya kuma ta shiga tarihi karkashin jagorancin JKS. Doguwar tafiyar rundunar sojin ta ratsa larduna sama da 10, ta kai km 12500, wadda ta dakile matakan da miliyoyin sojojin makiya suka yi na samame, matakin da ya sanar da gazawar makircin ‘yan adawar jam’iyyar Kuomingtang na dakile JKS da rundunarta.  Ya jaddada cewa, ruhin doguwar tafiyar ya nuna karfin aminci da gaskiya, da karfin adalci da hadin kai, kuma a matsayinsa na muhimmin bangare na jerin ruhohin ‘yan JKS, dukiya ce mai daraja da ingantaccen karfi na karawa matasa kwarin gwiwa don su shawo kan kalubale da tafiya zuwa gaba.  Xi ya kuma kara da cewa, tunawa da tarihi shi ne ginshigin kafa makoma, kuma ya kamata dukkan ‘yan jam’iyyar JKS da sojoji da dukkan al’ummar kasar su yayata ruhin babbar doguwar tafiyar, da ingiza babban aikin da magabata suka dukufa kan shi zuwa gaba. (Amina Xu) 

Ma’aikatar kasuwanci ta Sin ta ce, ci gaban da kamfanonin fasahar AI na kasar suka samu cikin sauri, ya samo asali ne daga lokaci mai tsawo da aka dauka ana zurfafa bincike mai tushe da kara karfin kirkire-kirkire, kuma ba shi da alaka da abin da ake kira wai “satar sirrin kasuwanci”.   Kakakin ma’aikatar ne ya bayyana haka jiya Talata, yayin da yake amsa tambayoyin manema labarai kan takunkumin da Amurka ta kakaba wa kamfanonin Sin bisa zargin satar sirrin kasuwanci.   A cewar kakakin, Amurka na bata sunan kamfanonin Sin da kuma kakaba musu takunkumi, lamarin dake matukar lalata muhimmiyar moriyar kamfanonin, kuma Sin na adawa da hakan.  Bugu da kari, game da sanarwar da ma’aikatar tsaron cikin gida ta Amurka ta fitar kan umarnin kayyadewa da hana shigar da kayayyakin kamfanonin Sin, kakakin ya ce, Sin na bukatar Amurka da ta mutunta tsari da ka’idojin kasuwa, kuma ta gyara kuskuren da take yi nan take, kana ta daina matsin lamba maras dalili kan kamfanonin Sin. Ban da wannan kuma, ta soke matakan nuna wariya, domin a shimfida kyakkyawan yanayi da kamfanonin kasashen biyu za su ci gaba da mu’amala da hadin gwiwa yadda ya kamata.   Ya ce, Sin za ta ci gaba da lura da al’amarin, kuma za ta dauki duk matakan da suka dace kan duk wani abu dake lalata muradunta, don kare moriyar kamfanonin kasar. (Amina Xu) 

A shekarar 1936, dan jarida Ba’amurke Edgar Snow, ya gabatarwa duniya JKS ta littafinsa mai taken Red Star Over China,...

Da safiyar yau Laraba, firaministan kasar Sin Li Qiang da takwaransa na kasar Rasha Mikhail Vladimirovich Mishustin, sun jagoranci taron ganawar firaministocin kasashen Sin da Rasha karo na 31 a birnin Saint Petersburg na kasar Rasha.  A yayin taron, bangarorin biyu sun cimma ra’ayi daya, cewa jagorancin da shugabannin kasashen biyu suka bayar, ya zama muhimmin tabbaci ga ci gaba mai dorewa na dangantakar dake tsakanin Sin da Rasha. Haka kuma, ya kamata a bi ra’ayi daya da shugabannin kasashen biyu suka cimma, domin inganta hadin gwiwa a fannoni da dama, kamar ciniki da zuba jari, da albarkatu da makamashi, da hada-hadar sufuri da sadarwa, da ayyukan sararin samaniya, da harkokin kudi, da kuma masana'antu da dai sauransu, baya ga samar da sabbin damammakin da za su haifar da ci gaba a fannoni na zamani, kamar fasahar AI, da fasahar kere-kere ta fannin halittu, da kuma tattalin arzikin zamani na dijital da dai sauransu. Haka kuma, ya kamata kasashen biyu su hada kansu don tabbatar da nasarar gudanar da harkokin "Shekarar Ilimi ta Sin da Rasha", tare da karfafa mu'amala tsakanin al'ummomin kasashen biyu, a fannoni irin su yawon bude ido, da al'adu, da matasa, da kafofin watsa labarai da dai sauransu, ta yadda za a fadada hadin gwiwa a tsakanin kananan hukumomi ko yankuna na kasashen biyu, da inganta tuntubar juna kan al'amuran dake shafar bangarori da dama, domin cimma sakamako na zahiri.  Bayan taron, firaministocin kasashen biyu sun sanya hannu kan sanarwar hadin gwiwa, ta taron ganawar firaministocin Sin da Rasha karo na 31. Haka kuma, bangarorin biyu sun kulla yarjejeniyoyin hadin gwiwa da dama, wadanda suka shafi harkokin tattalin arziki da ciniki, da ayyukan sararin samaniya, da kimiyya da fasaha, da kuma aikin ba da ilimi da dai sauransu. (Mai Fassara: Maryam Yang) 

Kasar Sin ta kaddamar da harba roka daga saman teku da ke kusa da birnin Rizhao na lardin Shandong da...

Ranar 22 ga watan Oktoba ita ce ranar maganin gargajiya ta duniya. Bayanai daga taron kasa da kasa karo na 23 kan maganin gargajiya na kasar Sin, wanda aka kammala kwanan nan sun nuna cewa, likitanci da maganin gargajiya na Sin ya yadu zuwa kasashe da yankuna 196, kuma adadin mutanen da suka samu jiyyar allurar gargajiya ta Sin, da tausa, da sauran fasahohin likitancin gargajiya na Sin a duniya ya wuce kashi daya bisa uku na jimillar al'ummar duniya, inda al'ummar kasashe da yankuna da yawa ke amfana da likitancin gargajiya na Sin.   Hakika, likitancin gargajiya na Sin na yaduwa zuwa Afirka ta hanyoyi daban-daban, kuma yana shiga cikin tsarin kiwon lafiya na sassan nahiyar.  A Mali, cibiyar Luban ta koyar da fasahar likitancin gargajiya na Sin ta riga ta yi aiki na sama da shekaru 6. A shekarar 2019, makarantar koyon aikin likita ta Tianjin ta yi hadin gwiwa da jami'ar kimiyya da fasaha ta Bamako dake kasar Mali, inda suka kafa cibiyar Luban ta farko ta koyar da fasahar likitancin gargajiya na Sin a duniya. Ya zuwa shekarar 2026, cibiyar ta horar da kwararru masu alaka da likitancin gargajiya na Sin sama da mutum dubu daya, daga cikinsu dalibai 54 sun zama kwararrun likitocin gargajiya na Sin bayan sun sami cikakken horo. Diarra Boubacar mutum ne da ya yi kira da a kafa wannan cibiyar, kuma shi kansa ya ganewa idonsa tarihin bunkasar cibiyar. Ya zo nan kasar Sin domin karatu a shekarar 1984, inda ya zama bakon farko da ya sami digiri na uku a fannin likitancin gargajiya na Sin. Daga nan, ya dade yana aikin likita a Sin, kuma a shekarar 2019 ya ingiza gina cibiyar Luban ta Mali. Ya ce, "Likitancin gargajiya na Sin gada ce da ke hada al'adu daban-daban. A nan gaba, za mu yi kokari wajen horar da tarin kwararrun likitocin gargajiya na Sin a cikin gidanmu, domin kara bunkasa likitancin gargajiya na Sin a Mali."  A Harare babban birnin Zimbabwe kuwa, cibiyar likitancin gargajiya ta tsakanin Sin da Zimbabwe, tun kafuwarta a shekarar 2020, ta riga ta ba da hidimomin jinya, da magani sama da sau dubu 25, kuma ita ce cibiyar likitancin gargajiya ta Sin mafi girma a yankin kudu da Sahara na Afirka. Cibiyar ta yi hadin gwiwa da sashen kiwon lafiya na Zimbabwe, tana zabar dalibai masu hazaka zuwa cibiyar domin samun horo na gudanar da aikin likita a asibiti. A halin yanzu, dalibai da dama sun ci jarrabawa, wadanda suke iya gudanar da jinyar allura da kansu. Dalibi mai suna Richard Mutingwende, bayan ya ci jarrabawar, ya bude wani asibiti na likitancin gargajiya na Sin a Harare.  Cibiyar likitanci da allurar gargajiya ta Sin ta Afirka, ita ce cibiyar horo ta gudanar da aikin jinyar allura ta jami'ar Johannesburg ta Afirka ta kudu. Tun daga shekarar 2020, jami'ar Johannesburg ta bude kwasa-kwasan allurar, inda kowace shekara take karbar kusan dalibai masu karatun digiri na farko kimanin 50, da daliban digiri na biyu 20, tana amfani da hanyar hada koyarwa a aji da aikin ba da jinya a asibiti tare, domin horar da kwararrun likitocin gargajiya na Sin.  Har ila yau, a cikin azuzuwan jami'o'in likitancin gargajiya na Sin da dama dake Sin, dalibai daga Afirka har yanzu suna maimaita gwajin yadda za a yi jinyar allura a kan samfurin jiki. Wasu daga cikinsu, bayan sun kammala karatu sun koma gida, za su bude asibiti kamar yadda Diarra ya yi, ko kuma su zama likitocin farko da suka iya allurar a yankinsu kamar Richard. Likitancin gargajiya na Sin mahada ce tsakanin Sin da Afirka—daga Mali zuwa Harare zuwa Johannesburg—ya yadu zuwa Afirka bisa kokarin mutanen nahiyar, wadanda suka kai fasahar zuwa kasashensu, ta wannan mataki kuma ake fadada hadin gwiwar kiwon lafiya tsakanin Sin da Afirka.  (Marubuciya: MINA)