Fadar Shugaban Ƙasa ta bayyana cewa ba lallai sai Shugaba Bola Ahmed Tinubu yana Abuja a zahiri ba kafin ya iya gudanar da cikakkun ayyukansa na shugabancin Nijeriya.
Fadar shugaban ƙasar ta jaddada cewa a wannan zamani na ci gaban fasahar sadarwa, shugaban na iya tafiyar da harkokin mulki daga kowane wuri da yake a ciki ko wajen ƙasar. Ta ƙara da cewa Tinubu na ci gaba da sanya hannu a kan muhimman takardu, da tuntuɓar ministoci da jami’an tsaro, da kuma ba da umarni kan dukkan al’amuran da suka shafi ƙasa.
Wannan martani ya biyo bayan ce-ce-ku-ce da tambayoyi da wasu ƴan adawa da kuma ƴan ƙasa suka riƙa yi dangane da rashin ganin shugaban ƙasar a fadar gwamnati da ke Abuja a daidai lokacin da ƙasar ke fuskantar matsin tattalin arziƙi da ƙalubalen tsaro.
Sanarwar ta yi watsi da zargin cewa akwai giɓi a shugabancin ƙasa, inda ta bayyana cewa tsarin tafiyar da gwamnati na tafiya lafiya ƙalau ba tare da wata tangarɗa ba, kuma shugaban na da cikakkiyar masaniya kan duk wani abin da ke gudana a Nijeriya.
A ƙarshe, Fadar Shugaban Ƙasa ta buƙaci ƴan Nijeriya da su daina damuwa kan inda shugaban yake a zahiri, su kuma mayar da hankali kan ayyukan gyara da shirye-shiryen ci gaba da gwamnatinsa ke aiwatarwa domin inganta rayuwar al’umma.
