Mataimakin Shugaban Ƙasar Nijeriya, Sanata Kashim Shettima, ya dawo gida Nijeriya bayan ya kammala wakiltar Shugaba Bola Ahmed Tinubu a babban taron Majalisar Ɗinkin Duniya karo na 81 (UNGA81) da ya gudana a birnin New York na ƙasar Amurka.
A yayin da yake gabatar da jawabin Nijeriya a gaban taron shugabannin duniya, Shettima ya buƙaci a yi garambawul ga tsarin Majalisar Ɗinkin Duniya, musamman ta hanyar bai wa nahiyar Afirka kujeru na dindindin a Kwamitin Sulhu na majalisar domin tabbatar da adalci da wakilci na bai-ɗaya a harkokin shugabancin duniya.
Baya ga jawabin da ya gabatar a babban zauren majalisar, mataimakin shugaban ƙasar ya jagoranci tawagar Nijeriya wajen gudanar da tattaunawa ta musamman da shugabannin ƙasashe, shugabannin hukumomin ƙasa da ƙasa, da kuma manyan masu zuba jari domin jawo sabbin jarin ƙasashen waje zuwa Nijeriya.
Jirgin da ya ɗauko mataimakin shugaban ƙasar ya sauka ne a Filin Jirgin Sama na Ƙasa da Ƙasa na Nnamdi Azikiwe da ke Abuja, inda manyan jami’an gwamnatin tarayya da shugabannin hukumomin tsaro suka tarɓe shi.
Dawowar Shettima na zuwa ne a daidai lokacin da gwamnatin tarayya ke ci gaba da ƙoƙarin aiwatar da sauye-sauyen tattalin arziƙi a ƙasar, tare da yin amfani da damarmakin haɗin gwiwa da aka kulla a birnin New York domin ciyar da muradun Nijeriya gaba.
